يسەكەشەۆ استانادا « اۆتوبۋستار جارىسىن» توقتاتۋدىڭ جولىن تاپتى

«قازىر قالاي؟ بىزدە 8 اۆتوپارك بار. ولار مارشرۋتتاردى الادى دا، جولاۋشىلاردى كوپتەپ جيناۋعا تىرىسادى. سودان ءبىر-بىرىمەن جارىسادى، جولاۋشىلارمەن ۇرىسادى. كوندۋكتورلار دا كوپ. ال "Bus كيلومەتر" جۇيەسى بويىنشا جولاۋشىلاردىڭ سانى ەسكەرىلمەيدى. نەگىزگى مىندەت - ساپالى قىزمەت كورسەتۋ. ءبىز سوعان كوشۋدى كوزدەيمىز. ول ءۇشىن ءبىر جىل بويى ينۆەستيتسيالار مينيسترلىگىمەن جۇمىس ىستەپ، زاڭنامانى وزگەرتتىك»، - دەدى اسەت ورەنتاي ۇلى بۇگىن قالالىق كولىك كەشەنىن دامىتۋ ماسەلەرىنە ارنالعان پارتيالىق تىڭداۋدا.
الايدا اۆتوپاركتەر جولاۋشىداردىڭ سانىن قۋالاي بەرمەي، قىزمەت ساپاسىنا كوڭىل بولەتىندەي جاعداي جاساۋ ءۇشىن تۇراقتى قارجىلاندىرۋ تەتىگى بولۋى شارت. وسىعان بايلانىستى اكىمدىك قوعامدىق كولىك سالاسىن قارجىلاندىرۋدىڭ ءۇش جولىن ۇسىنىپ وتىر. ءبىرىنشىسى - تاريف + سۋبسيديا. ەكىنشىسى - تاريفتى، ياعني بيلەت باعاسىن كوتەرۋ. ءۇشىنشىسى - اۆتوبۋسپەن تەگىن قاتىناۋ. الايدا ول ءۇشىن اي سايىن بەلگىلى ءبىر سومادا جارنا تولەۋ كەرەك.
«ەندى، ول سالىق ەمەس، قوعامدىق كولىكتى دامىتۋ ءۇشىن الىناتىن كوممۋنالدىق تولەم ءتارىزدى. مىسالى، قازىر ءبىر وتباسى 30-40 مىڭ تەڭگەگە جول ءجۇرۋ بەلەتىن («پروەزدنوي» - اۆت. ) ساتىپ السا، جاڭا جۇيە بويىنشا 3 اق مىڭ تەڭگە تولەيتىن بولادى. جەكە كولىكپەن جۇرەتىن ءبىز دە ءۇش مىڭنان تولەيمىز. سوندا ءبارىمىز قوعامدىق كولىك سالاسىن دامىتۋعا اقشا قۇيعانداي بولامىز. ارينە، بۇل ماسەلەنى ءالى دە تالقىلاۋ قاجەت. حالىقتىڭ پىكىرىن بىلگەن ءجون»، - دەپ اتاپ كورسەتتى اسەت ورەنتاي ۇلى.
"استانا LRT" كومپانياسى ءتوراعاسىنىڭ مىندەتىن اتقارۋشى جاننا اقجانوۆانىڭ ايتۋىنشا، "Bus كيلومەتر" جۇيەسىنىڭ باستى ەرەكشەلىگى سول، اۆتوبۋس جۇرگەن ءاربىر كيلومەتردىڭ شىعىندارى تولەنەدى. سوندا كولىك جۇرگىزۋشىلەرى جولاۋشىلار ءۇشىن جارىسپايدى، كۇندەلىكتى مارشرۋتتارىن عانا ورىنداۋعا تىرىسادى. ال GPS ارقىلى ءاربىر اۆتوبۋستىڭ قاي ايالدامادا توقتاعانى، ۋاقىت جيىلىگىن ساقتاعانى جانە تاعى باسقا مالىمەتتەر تەكسەرىلەدى.
«ءبىر جىل بۇرىن وسىنداي جۇيە ماسكەۋ قالاسىندا ەنگىزىلدى. قازىردىڭ وزىندە ونىڭ تيىمدىلىگى انىق بايقالىپ وتىر. اۆتوبۋستار جاڭاردى، سانى كوبەيدى. حالىق قوعامدىق كولىكپەن ءجيى جۇرە باستادى»، - دەيدى اقجانوۆا.