شاڭحايدا ق ر مەن ق ح ر اراسىنداعى ساۋدا جانە ينۆەستيتسيانى ىنتالاندىرۋ ورتالىعى اشىلادى

28- قىركۇيەك كۇنى شاڭحاي قالاسىندا ەكسپو-2017 كورمەسىنە قاتىسقان 12 قىتايلىق كومپانيا وكىلدەرى وسى وقيعاعا ارنالعان قازاقستان-قىتاي كونفەرەنسياسىنىڭ اياسىندا جاڭا ورتالىق قۇرۋ تۋرالى مەموراندۋمعا قول قويدى.
قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى ساۋدا-ەكونوميكالىق جانە ينۆەستيتسيالىق ىنتىماقتاستىقتى ىنتالاندىرۋ ورتالىعى، ەڭ الدىمەن، جىجياڭ، جياڭسۋ، جياڭشي، انحوي، فۋجيان جانە شاڭحاي قالالارىنداعى قىتايلىق كاسىپكەرلەرگە ينۆەستيتسيالىق، كەدەن جانە باسقا دا سالالارداعى قازاقستان زاڭنامالىق نورمالارىن تۇسىندىرۋدە كونسۋلتاتسيالىق قولداۋ كورسەتۋ جانە ونى ۇيىمداستىرۋعا، سونىمەن قاتار باسقا دا انىقتامالىق قىزمەتتەردى ۇسىنۋ باعىتتالعان.
بۇل قۇرىلىمدى قۇرۋ تۋرالى يدەيا وتكەن كونفەرەنتسيادا قىتايلىق كومپانيالار اراسىنان ەكسپو-2017-ءنىڭ بەلسەندى قاتىسۋشىلارىنا العىس حاتتار تابىس ەتكەن قازاقستان رەسپۋبليكاسىنىڭ شاڭحايداعى باس كونسۋلدىعىنا تيەسىلى. كونفەرەنسياعا بارلىعى 50 دەن استام قىتايلىق كومپانيانىڭ وكىلدەرى قاتىستى.