استانادا «تاريحي اتاجۇرت» قوعامدىق بىرلەستىگى ءوز جۇمىسىن باستادى

«ەلباسىنىڭ «ماڭگىلىك ەل» يدەياسى، «نۇرلى جول» باعدارلاماسى، «بولاشاققا باعدار: رۋحاني جاڭعىرۋ» ماقالاسىنىڭ باعىتتارىن ىسكە اسىرۋ جانە شەتتەگى قانداستارىمىزدىڭ ەلگە كەلىپ ەڭبەك ەتۋىنە مۇمكىندىك جاساۋ ماقساتىندا قۇرىلعان بىرلەستىكتىڭ الدا اتقارار جۇمىستارى كوپ» ، - دەيدى «تاريحي اتاجۇرت» قوعامدىق بىرلەستىگىنىڭ باسقارما ءتوراعاسى عالىم پەرنەبايەۆ.
اتالعان قوعامدىق بىرلەستىك قازاقستان تاۋەلسىزدىگىن العان العاشقى ساتتە الىستاعى اعايىندارعا حات جولداپ، جاتەلدەگى قانداستارىن قاناتىنىڭ استىنا الىپ، تاريحي ەرلىك جاساعان ەلباسىمىز نۇرسۇلتان ءابىش ۇلى نازاربايەۆتىڭ سەنىمىن اقتاۋ ارقىلى قازاق حالقىنا قالتقىسىز ەڭبەك ەتۋدى كوزدەيدى.
«تاريحي اتاجۇرت» بىرلەستىگى جانە وسى ۇيىمنىڭ قىزمەتتەرىن كورسەتۋ ماقساتىندا اشىلعان جاڭا سايت («http://atazhurt2050.kz» - اۆت. ) سىرتتاعى قازاقتاردىڭ ەلگە ورالىپ، شاڭىراق تىگىپ، جالپى قازاق ەلىنىڭ وركەندەۋىنە قوماقتى ۇلەس قوسۋى ءۇشىن اۋقىمدى شارالاردى جوسپارلاۋدا.
«ءبىز ەڭ اۋەلى «http://atazhurt2050.kz» اقپاراتتىق- تانىمدىق پورتال ارقىلى الەم قازاقتارىنىڭ ادەبيەتى مەن مادەنيەتىن ناسيحاتتاپ، تۇتاس قازاق يدەياسىن قالىپتاستىرۋعا، ونىڭ ءبىر عانا وتان - قازاقستانعا توپتاسۋىنا ءوز ۇلەسىمىزدى قوسپاقپىز. جوعارىدا اتالعان پورتال «جاڭالىقتار»، «ادەبيەت ارناسى»، «تاريح قورجىنى»، «سىر- سۇحبات»، «كوشى- قون»، «اقجولتاي» اتتى ايدارلارىمەن تىڭ دا دەرەكتى ماتەريالدار جاريالاپ، ءوز وقىرماندارىن قالىپتاستىراتىن بولادى»، - دەيدى «تاريحي اتاجۇرت» قوعامدىق بىرلەستىگى ديرەكتورىنىڭ ورىنباسارى جازۋشى ءجادي شاكەن ۇلى.
اۆتور: ريزابەك نۇسىپبەك ۇلى