07:11, 26 - قىركۇيەك 2017 | GMT +5
باسكەتبولشى قويان الەمدىك رەكورد ورناتتى
استانا. قازاقپارات - كاليفورنيادا بيني ەسىمدى بەس جاسار ءۇي قويانى گيننەستىڭ رەكوردتار كىتابىنىڭ سوڭعى باسىلىمىنا شىققان ەرەكشە حايۋانداردىڭ ءبىرى اتاندى.

بۇل تۋرالى UPI پورتالىنا سىلتەمەمەن «حابار 24» حابارلادى.
اقىلدى جانۋار باسكەتبول ويناپ، ءبىر مينۋتتا شىعىرىققا 7 كىشكەنە دوپتى ءدوپ سالعان. بۇنداي جەتىستىككە عالامشارداعى ەشبىر جانۋار ءالى جەتىپ كورمەگەن. قوياننىڭ يەسى شاي اسور بينيدىڭ جەتىستىكتەرى ونى قاتتى قۋانتقانىن ايتادى.
«بالا كەزىمدە جىل سايىن گيننەستىڭ رەكوردتار كىتابىنىڭ جاڭا باسىلىمىن جىبەرمەي وقيتىنمىن. ەندى سول كىتاپتان مەنىڭ دە جانۋارىمنىڭ ورىن العانى قاتتى قۋانتىپ وتىر»، - دەيدى امەريكالىق ازامات.
اسوردىڭ سوزىنشە، بيني كىشكەنە جاسىنان بەرى دوپ ويىندارىن قاتتى ۇناتقان. بۇنى بايقاعان كاليفورنيالىق ونى جاتتىقتىرا باستاپتى. شاي اسور قوياننىڭ مىقتى سپورتشى عانا ەمەس، ءتىپتى كەرەمەت سۋرەتشى ەكەنىن جانە تاراقتى پايدالانا بىلەتىندىگىن دە جاسىرمادى.