قوستانايلىقتار «نۇرلى جەر» ارقىلى كوتتەدج كىلتىنە يە بولدى
كوتتەدجدەر قوستانايدىڭ ىرگەسىندەگى زارەچنىي كەنتىندە ورنالاسقان. جاڭا باسپاناعا يە بولعان 14 ءۇي يەسىن قوستاناي وبلىسىنىڭ اكىمى ارحيمەد مۇحامبەتوۆ پەن تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا قۇتتىقتادى. كوتتەدج كىلتىنە يە بولعانداردىڭ 10-ى تۇرعىن ءۇي قۇرىلىس جيناق بانكىنىڭ سالىمشىلارى. جەر تەلىمىن الۋعا كەزەكتە تۇرعان ايماق تۇرعىندارى قۋانىشتارىن جاسىرمادى.
«جۇبايىم ەكەۋمىز 11 جىل بويى جەر تەلىمىن الۋ ءۇشىن كەزەكتە تۇردىق. ەكى بالامىز بار. ءبىزدى شاقىرىپ، جەرمەن بىرگە دايىن ءۇيدى دە الۋدى ۇسىنعان كەزدە، بىردەن كەلىستىك. قۇرىلىس جۇمىستارىن ۇنەمى باقىلاپ وتىردىق. بارلىعى ساپالى جاسالدى. وسىنداي مۇمكىندىك جاساپ وتىرعان ەلباسىنا العىسىمىز شەكسىز، - دەپ اسەرىمەن ءبولىستى بانك سالىمشىسى دينارا ەرعازينا.
تۇرعىندارعا اۋماعى 90 جانە 110 شارشى مەتر بولاتىن ءبىر جانە ەكى قاباتتى ۇيلەر بۇيىرىپ وتىر. جەر تەلىمىنەن ۇمىتكەرلەر وزدەرىنە تيەسىلى 10 سوتىق جەردە مەملەكەتتىك تەگىن راسىمدەدى، ال سول جەردە تۇرعىزىلعان ءۇيدى 1 شارشى مەترىن 115000 تەڭگەدەن ساتىپ الدى. بۇل رەتتە جەر يەلەرى تۇرعىن ءۇي قۇرىلىس جيناق بانكىنە جۇگىنگەن.
«بانك سالىمشىلارعا جىلدىعى 5 پايىزى بولاتىن زاەم بەردى. سىياقى مولشەرلەمەسى قازاقستان يپوتەكالىق كومپانياسى تولەگەن مەملەكەتتىك سۋبسيديانىڭ ارقاسىندا تومەندەتىلدى. نەسيە راسىمدەۋ ءۇشىن ت ءۇ ق ج ب دەپوزيتىندە ءۇي قۇنىنىڭ كەم دەگەندە 30 پايىزى قاجەت بولدى. «نۇرلى جەر» باعدارلاماسىنىڭ جەكە تۇرعىن ءۇي قۇرىلىسىن دامىتۋعا ارنالعان پيلوتتىق باعىتىنىڭ اياسىندا مەملەكەت سالىمشىلارعا تيەسىلى 10 سوتىق جەردى عانا بەرىپ قويماي، سول جەر تەلىمىندە جەكە تۇرعىن ءۇي سالۋعا دا كومەكتەستى. بارلىعى دا شەتەلدىك ۇلگىدە سالىنعان»، - دەدى بانكتىڭ وبلىستىق فيليالى ديرەكتورىنىڭ ورىنباسارى داۋرەن ەسەنبەكوۆ.
جىل سوڭىنا دەيىن قوستاناي وبلىسىندا تاعى 60 ءۇي پايدالانۋعا بەرىلەدى. كەلەسى جىلى كوتتەدج ۇيلەردىڭ قۇرىلىسى جالعاسادى. جالپى العاندا، بۇل اۋماقتا 270 نىسان بوي كوتەرەدى دەپ جوسپارلانىپ وتىر.
باتىر جولاي ۇلى
