قازاقستاندا جازاسىن وتەۋشى قانشا ادام بيزنەسمەن اتاندى؟

استانا. قازاقپارات - ق ر ىشكى ىستەر ءمينيسترى قالمۇحانبەت قاسىموۆ قىلمىستىق-اتقارۋ جۇيەسىندە قانشا ادام جۇمىسپەن قامتىلعانىن ايتىپ بەردى، دەپ حابارلايدى قازاقپارات ءتىلشىسى.

«كاسىبي ءبىلىمدى قامتاماسىز ەتۋمەن قاتار، جازاسىن وتەۋ مەرزىمىندە بارلىق ەڭبەككە جارامدى ادامداردىڭ جۇمىس ورىندارىمەن قامتىلعانىنا مۇددەلىمىز. مەكەمە تىنىس-تىرشىلىگىنىڭ وسى جانە باسقا دا پروبلەمالارىمەن ق ا ج كوميتەتىنە ۆەدومستۆولىق باعىنىستى «ەڭبەك» ر م ك اينالىسۋدا»، - دەدى مينيستر باس بوستاندىعىنان ايىرۋ ورىندارىنان بوساتىلعان جانە پروباتسيا قىزمەتىندە ەسەپتە تۇرعان ازاماتتاردى الەۋمەتتىك وڭالتۋدىڭ 2017-2019-جىلدارعا ارنالعان كەشەندى ستراتەگياسىن ىسكە اسىرۋ تاقىرىبىنداعى ۇكىمەت ساعاتىندا.

ونىڭ سوزىنە قاراعاندا، قازىرگى ۋاقىتتا تۇزەتۋ مەكەمەلەرىنىڭ كاسىپورىندارىندا مەتالل مەن اعاش وڭدەۋ، قۇرىلىس ماتەريالدارى، تىگىن بۇيىمدارى مەن باسقا دا ونىمدەردى شىعارۋ يگەرىلگەن. ءبىرقاتار مەكەمەلەردە اۋىل شارۋاشىلىعى ونىمدەرىن ءوندىرۋ رەتكە كەلتىرىلگەن كورىنەدى.

«تۇزەتۋ مەكەمەلەرى كاسىپورىندارىنىڭ قىزمەتىنە شاعىن جانە ورتا بيزنەس تە تارتىلۋدا. وتكەن جىلدان بەرى 274 ش و ب سۋبەكتىلەرىنە سەنىمگەرلىك باسقارۋعا مەكەمەلەردىڭ جۇمىس ىستەمەي تۇرعان وندىرىستىك الاڭدارى بەرىلىپ، وسى جەرلەردە 3 مىڭنان استام جازاسىن وتەۋشى ەڭبەكپەن قامتىلدى. قازىرگى كەزدە قاماۋدا وتىرعان 34 ادام جەكە كاسىپكەرلىكپەن اينالىسۋ قۇقىعىن پايدالانا وتىرىپ، كولونيادا جەكە بيزنەسىن ىسكە قوستى. جازاعا كەسىلگەندەردىڭ ءبىر بولىگى تۇزەتۋ مەكەمەلەرىنە قىزمەت كورسەتۋ بويىنشا شارۋاشىلىق-تۇرمىستىق جۇمىستارمەن قامتىلعان. بۇگىندە قىلمىستىق-اتقارۋ جۇيەسى بويىنشا ەڭبەككە قابىلەتتى 68 پايىزدان استام سوتتالۋشى ەڭبەگى تولەنەتىن جۇمىسقا تارتىلدى. بۇل ءوز كەزەگىندە ولارعا ءتۇرلى تالاپ-ارىزدار بويىنشا تولەم جاساۋعا مۇمكىندىك بەرەدى، ياعني شىعىننىڭ ورنىن تولتىرۋ، اليمەنتتەر، ايىپپۇلدار، وتباسىنا كومەك كورسەتۋ سەكىلدى ماسەلەلەرىن شەشۋدە»، - دەدى قاسىموۆ.

اۆتور: رۋسلان عابباسوۆ