استانادا تورەشىنى ساباعان بوكسشى مەن باپكەر سپورتتان شەتتەتىلمەك - كەسكىن
بۇل تۋرالى قازاقستان بوكس فەدەراتسياسىنىڭ رەسمي سايتى ءمالىم ەتتى.
وقيعا 22- قىركۇيەكتە استانادا قازاقستان بوكس فەدەراتسياسىنىڭ كۋبوگىنىڭ شيرەك فينالىندا استانالىق بوكسشى راحات مارجىقپايەۆ پەن امان قازانعاپوۆتىڭ كەزدەسۋىندە بولدى. جەكپە-جەك اياقتالعاندا تورەشى قازانعاپوۆتىڭ قولىن كوتەرەدى.
بۇل شەشىمگە كوڭىلى تولماعان ەلوردالىق سپورتشىنىڭ باپكەرى رينگتەن تۇسكەن رەفەريگە سوققى جاسايدى. سونداي-اق، جەڭىلىپ قالعان بوكسشى دا باپكەرىنە كومەكتەسىپ، تورەشىگە جۇدىرىعىن الا جۇگىرەدى.
قازاقستان بوكس فەدەراتسياسىنىڭ مالىمەتىنە سۇيەنسەك، وسى جەكپە-جەكتە تورەلىك ەتكەن امانگەلدى اقشولاقوۆتىڭ 28 جىلدىق تاجىريبەسى بار مامان ەكەنى جانە AIBA جوعارى كاتەگورياسىنىڭ يەگەرى ەكەندىگى ايتىلعان.
ونىڭ ۇستىنە ول ەۋروپا چەمپيوناتىنىڭ جۇلدەگەرى جانە كەڭەس وداعىنىڭ 1984-جىلعى چەمپيونى. اقشولاقوۆ مۇنداي وقيعا بولارىن كۇتپەگەنىن، ءبىرىنشى رەت بولىپ وتىرعانىن ايتقان.
وقيعادان كەيىن باپكەر كەلىپ، كەشىرىم سۇراعانىن، ءبىراق مۇنداي جاعدايلار جازاسىز قالماۋى ءتيىس ەكەنىن ايتىپ وتىر. ەندى وسى ىسكە بايلانىستى باپكەر دە، سپورتشى دا سپورتتان شەتتەتىلمەك. قانشا مەرزىمگە شەتتەتىلەتىنىن باپكەرلەر كەڭەسى مەن اتقارۋشى كوميتەت بيۋروسى شەشەتىن بولادى.
اۆتور: كۇنسۇلتان وتارباي
