ۆولەيبول: قازاقستان قۇراماسى الەم بىرىنشىلىگىنە جولداما الدى
«Qazsport» تەلەارناسىنان تىكەلەي ەفيردە كورسەتكەنىندەي، ۆياچەسلاۆ شاپران جاتتىقتىراتىن قازاقستاندىقتار جولداما ءۇشىن ءوزىنىڭ نەگىزگى قارسىلاسى قىتايلىق تايپەي قۇراماسىمەن كەزدەستى. ءبىرىنشى پارتيادا قازاقستاندىقتار باسىم تۇسكەنىمەن، ەكىنشىسىندە تايپەيلىكتەر ەسە قايىردى. ءۇشىنشى، ءتورتىنشى پارتيادا قازاقستان قۇراماسى باسىمدىق تانىتتى. دەگەنمەن تايپەيلىكتەر دە قارسىلاسىپ باقتى. ءتىپتى سوڭعى پارتيادا ەسەپ 13:23 بولىپ تۇرعان مەزەتتە ولار تاماشا ويناي ءبىلدى.
ەسەسىنە قازاقستان قۇراماسىنىڭ كاپيتانى رادميلا بەرەسنيەۆا دوپ الۋدا قاتەلىككە ءجيى بوي الدىردى. ەسەپ 20:23-كە جەتكەننەن كەيىن عانا قازاقستاندىقتار دوپتى ءوز پايداسىنا جازا الدى. ءسويتىپ بۇل پارتيادا 25:20 ەسەبىمەن جەڭىسكە جەتتى. قورىتىندى ەسەپ - 3:1. ماتچ بارىسىندا شابۋىلشىلار، ورال ۆولەيبولىنىڭ تۇلەگى سانا انارقۇلوۆا، ەكاتەرينا جدانوۆا، بايلانىستىرۋشى ناتاليا اكيلوۆا سىندى ويىنشىلار ءساتتى ونەر كورسەتتى.
وسىلايشا، بۇعان دەيىن اۆستراليالىقتاردى ۇتقان قازاقستان قۇراماسى الداعى جىلى جاپونيادا وتەتىن الەم چەمپيوناتىنا جولداما الدى.
اۆتور: ەلجان ەرالى
