ەڭبەك مينيسترلىگى الەۋمەتتىك قىزمەتكە مۇقتاجداردان ءوتىنىش كۇتپەيتىن بولادى

استانا. قازاقپارات - ەندىگى ۋاقىتتا مەملەكەت الەۋمەتتىك كومەككە مۇقتاج ادامداردىڭ وتىنىشپەن كەلگەنىن كۇتپەي ءوزى انىقتايتىن بولادى.

بۇل تۋرالى بۇگىن قازاقستان الەۋمەتتىك قىزمەتكەرلەرىنىڭ فورۋمىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات.

«ۇسىنىلاتىن قىزمەتتەردىڭ اتاۋلىلىعىن كۇشەيتۋ ءۇشىن ءوتىنىش بەرۋدەن انىقتاۋ ادىسىنە كوشۋ جوسپارلانۋدا. وتىنىشپەن عانا جۇمىس كۇردەلى جاعدايدىڭ اياقتالعانىن بولجايدى. ونى شەشۋ ايتارلىقتاي كۇش- جىگەردى تالاپ ەتەدى. بۇعان قوسا، الدىن الۋ ءساتى، ەرتە كەزەڭدە اتالعان جاعدايمەن جۇمىس ىستەۋ مۇمكىندىگى، ياعني تەرىس تەندەنتسيانىڭ دامۋىنا جول بەرمەۋ قولدان سۋسىپ كەتەدى»، - دەدى مينيستر.

 تامارا دۇيسەنوۆانىڭ ايتۋىنشا، وسىعان بايلانىستى قىزمەتكە مۇقتاج كونتينگەنتتى جەرگىلىكتى جەرلەردە انىقتاۋ قاراستىرىلۋدا. بۇل قىزمەت جەكە جانە ازاماتتىق سەكتوردىڭ اۋتسورسينگ ۇيىمدارىنا تولىقتاي بەرىلەدى.

«ناتيجەسىندە ازاماتتاردىڭ الەۋمەتتىك ءتىزىلىمى نەمەسە قىزمەت الۋشىنىڭ الەۋمەتتىك ءتولقۇجاتى تۇزىلەدى. وندا ازاماتتىڭ قاجەتتىلىكتەرى جانە الاتىن قىزمەتتەرى تۋرالى اقپارات بولادى»، - دەدى ول.

سونىمەن قاتار ول ەلىمىزدە الەۋمەتتىك قىزمەت كورسەتۋدىڭ كريتەريلەرىن قايتا قاراۋ جوسپارلانىپ وتىرعاندىعىن ايتتى.

 اۆتور: مارلان جيەمباي