ەلباسى الماتىعا جۇمىس ساپارىنىڭ قورىتىندىسى بويىنشا مالىمدەمە جاسادى

استانا. قازاقپارات - ەلباسى الماتى قالاسى مەن الماتى وبلىسىنا جۇمىس ساپارىنىڭ قورىتىندىسى بويىنشا مالىمدەمە جاسادى، دەپ حابارلايدى اقوردانىڭ باسپا ءسوز قىزمەتى.

 نۇرسۇلتان نازاربايەۆ جۇمىس ساپارىن قورىتىندىلاپ، الماتى قالاسى مەن الماتى وبلىسىنىڭ احۋالى جونىندە ايتتى.

 - الماتى قالاسى اكىمدىگى جۇرتشىلىقپەن بىرلەسىپ، ينفراقۇرىلىمدى جۇيەلى تۇردە جاقسارتۋعا، تۇرعىنداردىڭ جايلى ءومىر ءسۇرۋى ءۇشىن جاعداي جاساۋعا باعىتتالعان جۇمىستاردى تابىستى اتقارىپ جاتقانىن اتاپ وتكىم كەلەدى. پانفيلوۆ، جىبەك جولى كوشەلەرىنە كەشەندى قايتا جوندەۋ جۇرگىزىلدى. جاياۋ جۇرگىنشىلەردىڭ سەرۋەندەۋىنە ارنالعان الاڭدار جاساقتالدى. سونداي- اق، قالانى كوگالداندىرۋ، ارىق جۇيەسىن تولىق جەتىلدىرۋ جونىندەگى جۇمىستاردى جالعاستىرۋ قاجەت. قالادا ەكى اۋدان - الاتاۋ جانە ناۋرىزباي اۋداندارى قۇرىلدى. بيزنەسپەن اينالىسۋ ءۇشىن قاجەتتى جاعدايلار جاسالدى. قازىر مۇنداعى كاسىپكەرلەردىڭ بەلسەندىلىگى ارتا ءتۇستى.

 جالپى، الماتى ءىرى ەكونوميكالىق ورتالىق رەتىندە قالىپتاسىپ، ەلىمىزدىڭ الەمدىك دەڭگەيدەگى زاماناۋي مەگاپوليسىنە اينالدى. تاۋەلسىزدىك جىلدارىندا قالا ەكونوميكاسى قارقىندى تۇردە ءوسىپ، جوعارى كورسەتكىشتەرگە جەتتى. ماعان ۇسىنىلعان مالىمەتتەرگە سايكەس، بۇگىندە الماتى ەكونوميكاسىنىڭ كولەمى گرۋزيانىڭ ىشكى جالپى ونىمىنەن 2 ەسە، ال قىرعىزستان مەن تاجىكستاننان - 5 ەسەدەي ارتىق. بۇل - تەك قالانىڭ عانا ەمەس، جالپى ەلىمىزدىڭ تابىستى دامۋىنىڭ كورسەتكىشى. قازىر الماتى رەسپۋبليكالىق بيۋدجەتتىڭ دونورى بولىپ سانالادى. ول رەسپۋبليكا بويىنشا شاعىن جانە ورتا بيزنەستى دامىتۋدىڭ ۇزدىك كورسەتكىشتەرىنە قول جەتكىزىپ وتىر، - دەدى ەلباسى.

 بۇدان بولەك، ەلباسى الماتى وبلىسىندا دا كوپ جۇمىستاردىڭ اتقارىلىپ جاتقانىن اتاپ ءوتتى. سونىڭ ىشىندە، ءوڭىردىڭ الەۋمەتتىك- ەكونوميكالىق دامۋى وزىق قارقىنمەن جۇزەگە اسىرىلۋدا. بۇل اسىرەسە اۋىل شارۋاشىلىعى، قۇرىلىس، كولىك- ترانزيت سالالارىندا ايقىن بايقالۋدا. سوڭىندا مەملەكەت باسشىسى الماتى قالاسى مەن الماتى وبلىسىنىڭ وركەندەۋىنە جانە ودان ءارى دامۋىنا تىلەكتەستىك ءبىلدىردى.