نازاربايەۆ الماتىداعى جىلۋ ەلەكتر ستانسياسىن گازعا كوشىرۋ جونىندە تاپسىرما بەردى

الماتى. قازاقپارات - بۇگىن مەملەكەت باسشىسى نۇرسۇلتان نازاربايەۆ الماتىعا جۇمىس ساپارى بارىسىندا قالانىڭ دامۋى ماسەلەلەرىن تالقىلاۋعا ارنالعان جيىن وتكىزدى. وتىرىس بارىسىندا پرەزيدەنت قورشاعان ورتانى قورعاۋ ماسەلەلەرىنە ەرەكشە دەن قويدى.

 «سوڭعى جىلدارى اتموسفەرا قاباتىنىڭ لاستانۋى 20 پايىزعا ازايعان. بۇل جۇمىستى جالعاستىرۋ كەرەك. اكىمگە سامۇرىق قازىنامەن بىرىگە وتىرىپ، 2020 -جىلعا دەيىن ج ە س-2- ءنى گازعا كوشىرۋدى جانە جەكەمەنشىك سەكتوردى تۇگەل گازعا كوشىرۋدى اياقتاۋدى تاپسىرامىن. قالادا جاسىل- جەلەكتىڭ ءوسۋىن باقىلاۋدى جۇيەلەۋ كەرەك. بىلتىردىڭ وزىندە 5 مىڭ اعاش شابىلعان. بۇل ورايدا وتەماقىنى كوبەيتىپ، قاداعالاۋدى كۇشەيتۋ كەرەك»، - دەدى ول.

 سونداي- اق، مەملەكەت باسشىسى قالا اكىمدىگىنە قوقىس قالدىقتارىن جيناۋ، قورىتۋ، جويۋ سيكلىنىڭ تۇيتكىلدى ماسەلەلەرىن شەشۋدى تاپسىردى.

«سوڭعى 5 جىلدا قالا ينفراقۇرىلىمىن دامىتۋعا 430 ميلليارد تەڭگە جۇمسالعان. 30 جول ايرىعى، 330 شاقىرىم ينجەنەرلىك جەلىلەر سالىندى. قالا ورتالىعىنىڭ 1/3- ءى قايتا جاسالدى. الايدا بۇل جەردە ءالى دە شەشىمىن تاپپاعان ماسەلە بار. قالادا كولىك اعىنى ءالى دەپ كوپ. كۇنىنە 700 مىڭ كولىك كىرەدى. بۇل پروبلەمانى سمارت تەحنولوگيالار نەگىزىندەگى «اقىلدى كولىك جۇيەسى» ەلەمەنتتەرى ارقىلى شەشۋ كەرەك»، - دەدى مەملەكەت باسشىسى.

قالا كولەمىنىڭ قارقىندى ءوسىپ كەلە جاتقاندىعىن ەسكەرە وتىرىپ، مەملەكەت باسشىسى قالانىڭ باس جوسپارىن جاسايتىن ينستيتۋتتى قايتا قالپىنا كەلتىرۋ تۋرالى وي قوزعادى. «30 جىلدا قالا 2 ەسە ءوستى. الاتاۋ، ناۋرىزباي اۋداندارى قوسىلدى. ال باس جوسپار 2004 -جىلدان بەرى وزگەرمەگەن. باس جوسپارمەن اينالىساتىن ينستيتۋت 2008 -جىلى تاراپ كەتكەن بولاتىن. ەگەر اسا قاجەت بولسا، ينستيتۋتتى قالپىنا كەلتىرۋگە بولادى»، - دەدى ول.

 اۆتور: گۇلميرا عوسمانالي