نۇرسۇلتان نازاربايەۆ الماتىداعى ناۋرىزباي اۋدانىن ارالادى

الماتى. قازاقپارات - مەملەكەت باسشىسى نۇرسۇلتان نازاربايەۆ الماتىعا جۇمىس ساپارى بارىسىندا ناۋرىزباي اۋدانىنىڭ جاڭا اكىمشىلىك- ىسكەرلىك ورتالىعىن ارالادى، دەپ حابارلايدى قازاقپارات ءتىلشىسى.

مەملەكەت باسشىسىنا اۋدان ورتالىعى عيماراتتارىن سالۋعا وتاندىق وندىرۋشىلەردىڭ قۇرىلىس ماتەريالدارى پايدالانىلعانى تۋرالى ايتىلدى.

اۋداندا 2 جاڭا مەكتەپ، 3 ەمحانا، 17 سپورت جانە بالالار الاڭى سالىنعان. بۇل نىسانداردىڭ قۇرىلىسىندا قازاقستاندىق قامتۋ ۇلەسى 95 پايىزعا جەتكەن.

مەملەكەتتىك جەكە ارىپتەستىك اياسىندا 33 بالاباقشا سالىنعان.

 

اۋدان حالقى 100 پايىز كوگىلدىر وتىنمەن قامتىلدى.

ناۋرىزباي اۋدانىنىڭ اكىمى سايران سايفەدەنوۆ مەملەكەت باسشىسىنا اۋدان جەتىستىكتەرى تۋرالى بايانداپ بەردى.

اتاپ ايتقاندا، سالىق تۇسىمدەرىنىڭ 11 ەسە، شوب سۋبەكتىلەرىنىڭ 4 ەسە ارتقاندىعى جانە پولي ورتالىقتاندىرۋ ساياساتى اياسىندا اۋداننىڭ قارقىندى دامىپ كەلە جاتقاندىعى ايتىلدى.

«جاڭا اكىمشىلىك ورتالىق اشىلعالى بەرى بارلىق مەملەكەتتىك قىزمەت ءبىر جەردە كورسەتىلەدى. جاقىن ارادا مۇندا جاڭا سپورت جانە مادەنيەت نىساندارى بوي كوتەرەدى. تۇرعىن ءۇي، بالاباقشالار سالىنادى»، - دەدى س. سايفەدەنوۆ.

ەلباسى اۋداننىڭ ارداگەرلەر كەڭەسىنىڭ وكىلدەرىمەن اڭگىمەلەستى.

«الماتىدا حالىق سانىنىڭ ارتۋى قالانى كەڭەيتۋدى تالاپ ەتەدى. وسىدان ءۇش جىل بۇرىن ناۋرىزباي اۋدانىن اشۋ تۋرالى شەشىم قابىلدانعان ەدى. وسى ۋاقىت ىشىندە قالاعا ءتان ينفراقۇرىلىمدى دامىتۋ جاعىنان كوپ ءىس اتقارىلدى. سونداي- اق، قالانىڭ ورتالىعىمەن جىلدام بايلانىستىراتىن كولىك قاتىناسىن ۇيىمداستىرۋ ماسەلەسىنە قاتىستى قاجەتتى شارالار قابىلدانادى»، - دەدى مەملەكەت باسشىسى.

ءوز كەزەگىندە ارداگەرلەر كەڭەسىنىڭ مۇشەلەرى اۋداننىڭ قارقىندى دامۋىنا دەمەۋ بولعانى ءۇشىن مەملەكەت باسشىسى نۇرسۇلتان نازاربايەۆقا العىستارىن ءبىلدىردى.

ايتا كەتۋ كەرەك، اۋداننىڭ جاڭا اكىمشىلىك ورتالىعى بيىل اشىلدى. ورتالىقتا اكىمدىك، سوت، پروكۋراتۋرا، ح ق ك و، ا ح ا ج، قازپوشتا، زەينەتاقى تولەۋ ورتالىعى، مەملەكەتتىك كىرىستەر، ادىلەت دەپارتامەنتتەرى ورنالاسقان.

اۆتور: گۇلميرا عوسمانالي