وزبەكستان حالىقارالىق ىقپالىن ارتتىرۋعا كىرىستى - شىعىستانۋشى

استانا. قازاقپارات - شىعىس تانۋشى جانات مومىنقۇلوۆتىڭ ويىنشا، بۇگىندە وزبەكستان مەملەكەتى قازاقستاننىڭ تاجىريبەسى نەگىزىندە ءوز ەكونوميكاسىن نارىقتىق ەكونوميكاعا بارىنشا بەيىمدەۋدى كوزدەيدى. بۇدان بولەك، وسى ەلدىڭ جاڭا بيلىگى ەلدىڭ حالىقارالىق ىقپالىن ارتتىرۋعا كىرىستى،

 دەپ حابارلايدى قازاقپارات ءتىلشىسى.

 «وزبەكستان ءوز ەكونوميكاسىن ليبەرالداندىرا باستادى. ولار نارىقتىق ەكونوميكانىڭ زاڭدىلىقتارىنا بەيىمدەلۋدى قالايدى. ۆاليۋتالارى قۇنسىزداندى، ديەۆالۆاتسيا بولدى. قازاقستان بۇنىڭ بارىنەن 90 جىلدارى ءوتىپ كەتكەن. سوندىقتان ءبىزدىڭ تاجىريبەمىز ولار ءۇشىن قىزىق بولىپ تۇر. ماسەلەن، ءبىز سان الۋان ەكونوميكالىق رەفورمالارعا باردىق. وزبەكستان بولسا، ءاۋ باستا اشىلدى دا، كەيىن جابىلىپ قالدى. ءبىز بىردەن رەفورمانى ىسكە اسىرۋعا كىرىسسەك، ولار بىرتە- بىرتە جاساۋدى ۇيعاردى»، - دەدى مومىنقۇلوۆ قازاقپارات تىلشىسىنە بەرگەن سۇحباتىندا.

ساراپشىنىڭ ايتۋىنشا، مەملەكەت باسشىسى نۇرسۇلتان نازاربايەۆتىڭ وسى جولعى ساپارى بارىسىندا ەكىجاقتى بيزنەس ءۇشىن بارىنشا جاعداي جاساۋ ماسەلەسى دە ورىندى كوتەرىلدى. سونىڭ ارقاسىندا ينۆەستيتسيالاردى تارتىپ، ءوزارا ساۋدا ساتتىقتى ارتتىرۋعا بولادى. وزبەكستان ارقىلى ەكپورتتى دا ۇلعايتۋعا مۇمكىندىك بار.

«نەگىزى، قازىرگى كەزدە وزبەكستان مەملەكەتىنە قازاقستاننىڭ قولداۋى قاجەت. سەبەبى بيلىك اۋىسقاننان كەيىن الدىمەن جاقىن جاتقان كورشى ەلدەردىڭ قولداۋىن ىزدەيدى. شاۆكات ميرزيييەۆ ەلدىڭ ىشىندە قولداۋ تاپتى. ەندى، شەتەلدەگى ىقپالىن ارتتىرىپ جاتىر. ويتكەنى حالىقارالىق ۇيىمداردا باسقا مەملەكەتتەردىڭ قولداۋى قاجەت. ال قازاقستان حالىقارالىق ساحنادا كەڭىنەن تانىلىپ ۇلگەرگەن»، - دەپ اتاپ كورسەتتى شىعىستانۋشى مومىنقۇلوۆ.

اۆتور: ارمان اسقاروۆ