ەلباسى «كونە تاراز» تاريحي-مادەني كەشەنىندەگى دوستىق ءۇيى عيماراتىن ارالادى

تاراز. قازاقپارات - كيەلى اۋليەاتا وڭىرىنە جاساعان ساپارى كەزىندە ەلباسى نۇرسۇلتان نازاربايەۆ «كونە تاراز» تاريحي-مادەني كەشەنىنەن بوي كوتەرگەن دوستىق ءۇيى عيماراتىن ارالاپ كوردى.

سونىمەن قاتار مەملەكەت باسشىسى جامبىل وبلىستىق ق ح ا وكىلدەرىمەن جۇزدەستى، دەپ حابارلايدى قازاقپارات.

دوستىق ءۇيى وبلىستاعى ەتنوس وكىلدەرىن ءبىر ورتاعا بىرىكتىرگەن كيەلى شاڭىراق بولىپ سانالادى.

ساۋلەتتى عيماراتتى سالۋعا مەملەكەت قازىناسىنان 1 ميلليارد 277 ميلليون تەڭگە ءبولىنىپ، ماقساتتى يگەرىلدى. بۇگىنگى تاڭدا وبلىس اسسامبلەياسىنىڭ قۇرامىندا 175 قوعامدىق كەلىسىم كەڭەستەرى، 27 انالار كەڭەسى، 12 مەدياتسيا كابينەتى، 12 اقساقالدار كەڭەسى، قازاقستان حالقى اسسامبلەياسىنىڭ كافەدراسى، عىلىمي-ساراپتامالىق توپ، قولونەر شەبەرلەرىنىڭ كلۋبى جانە «اق جەلكەن» جاستار ليگاسى جۇمىس ىستەيدى. سونداي-اق مۇنداعى 240 ورىندىق ءماجىلىس زالى، پىكىرلەسۋگە ارنالعان دوڭگەلەك ۇستەل الاڭى، ءجۇز ادامعا ارنالعان كونفەرەنتس-زال، عىلىمي-ادىستەمەلىك بولمەلەر، حورەوگرافيالىق زال وڭىردەگى يگى شارالاردى وتكىزۋدە، ەلباسى ساياساتىن ناسيحاتتاۋدا وڭ ناتيجە كورسەتىپ وتىر.

بۇگىندە قازاقستان حالقى اسسامبلەياسى ەتنوستىق قۇرام وكىلدەرىنەن قازاق، ورىس، دۇنگەن، تۇرىك، وزبەك، كۇردى، ازەربايجان، قىرعىز، كورەي، تاتار، نەمىس، ۋكراين جانە تاعى سول سياقتى 73 ەتنومادەني بىرلەستىكتەردىڭ باسىن بىرىكتىرىپ، جۇمىس اتقارۋدا. ونىڭ 26 سى وبلىس ورتالىعىندا، 47 ءسى اۋدانداردا قۇرىلعان. جالپى قازىرگى تاڭدا جامبىل وبلىسىندا 87 ەتنوس وكىلى ءومىر ءسۇرىپ جاتىر.

ءبارى دە دوستىق ءۇيى شاڭىراعىندا تاۋەلسىز قازاقستاننىڭ وركەندەۋىنە، دامۋىنا ۇلەس قوسىپ كەلەدى. بەيبىتشىلىك پەن كەلىسىم ورداسىنىڭ دا نەگىزگى ماقساتى مەن مىندەتى - عاسىرلار بويى قالىپتاسقان قازاقتىڭ دارحاندىعىن، كەڭپەيىلدىگىن دارىپتەۋ، ناسيحاتتاۋ.

ايتا كەتەرلىگى، «كونە تاراز» تاريحي-مادەني كەشەنىنەن بوي كوتەرگەن دوستىق ءۇيى نىسانى قولدانىسقا 2016-جىلدىڭ 10- قىركۇيەگىندە بەرىلگەن بولاتىن.

اۆتور: مارلان جيەمباي