مەملەكەت باسشىسى گولوۆكين مەن الۆارەس جەكپە- جەگىنە پىكىر ءبىلدىردى
«سىزدەردىڭ جەڭىستەرىڭىزگە قاراپ جاستار سپورتپەن اينالىسۋعا ۇمتىلاتىن بولادى. ال بۇل ۇلتتىڭ دەنساۋلىعى، كەلەشەكتىڭ سالاۋاتى. قانداي جاستار، قىزدار ومىردە داڭقتى بولعىسى كەلمەيدى. اركىم ءوزىنىڭ قابىلەتىمەن ءارتۇرلى جەتىستىككە جەتەدى. بىرەۋى عىلىمدا، ەكىنشىسى ماتەماتيكادا، ءۇشىنشىسى تاعى ءبىر سالادا، ءتورتىنشىسى سپورتتا اتى شىعادى»، - دەپ اتاپ ءوتتى ەلباسى كەزدەسۋ بارىسىندا.
سونىمەن قاتار مەملەكەت باسشىسى بۇگىنگى گولوۆكين مەن الۆارەستىڭ شارشى الاڭداعى جەكپە- جەگىنە دە توقتالدى.
«بۇگىن بارلىقتارىڭىز گولوۆكينگە جانكۇيەر بولدىڭىزدار ما؟ مەن باستان-اياق كوردىم. ول جەڭگەن سياقتى دەپ داۋلاسىپ جاتىر. بارلىق ۋاقىتتا سولاي ايتادى. ءار كەز دا جەڭىسكە جەتپەگەنگە بىرەۋلەر كىنالى. پلاتون «ادام وزىنەن بۇرىن قۇدايدى، تاعدىرىن، ۇكىمەتتى ايىپتاپ شىعا كەلەدى» دەپ ايتىپ كەتكەن. سوندىقتان دا ەڭ دۇرىسى جاتتىعىپ، جەڭىسكە جەتۋ ءۇشىن ايقىن باسىمدىق كورسەتۋ كەرەك»، - دەدى نۇرسۇلتان نازاربايەۆ.
كەزدەسۋ سوڭىندا قازاقستان پرەزيدەنتى سپورتشىلارىمىزعا جەڭىس تىلەدى.
«قازىرگى ۋاقىتتا بۇل وتە ماڭىزدى سالا. مەن سپورتتى، سەندەردى قولدايمىن. ويتكەنى بولاشاق سەندەردىڭ، جاستاردىڭ قولىندا»، - دەدى ەلباسى.
