قازاقستاندىق سپورتشىلار ەلباسىنا ازيا ويىندارىندا ءساتتى ونەر كورسەتۋگە ۋادە ەتتى
كەزدەسۋ بارىسىندا قازاقستان پرەزيدەنتى ۇلتتىق قۇرامانىڭ دايىندىعىمەن تانىسىپ، اشحابادقا سپورتشىلارىمىزدى قولداۋ ءۇشىن ارنايى كەلگەنىن ايتتى.
«مۇندا ويىندارعا قاتىسىپ جاتقان ەلدەردىڭ ەڭ ۇزدىك سپورتشىلارى كەلىپ وتىر. ءبىزدىڭ قۇرامادا دا كوپتەگەن تانىمال چەمپيوندار بار»، - دەدى نۇرسۇلتان نازاربايەۆ.
قازاقستاننىڭ ۇلتتىق قۇراماسىنىڭ كاپيتانى ءارى وسى ويىنداردا تاەكۆوندودان ونەر كورسەتەتىن نۇرلان مىرزابايەۆ مەملەكەت باسشىسىنا العىس ءبىلدىردى.
«ەڭ الدىمەن، سىزگە ەلىمىزدەگى سپورتتى دامىتۋعا ۇدايى قولداۋ كورسەتىپ وتىرعانىڭىز ءۇشىن العىس ايتامىن. مەملەكەتىمىزدىڭ الەمدىك سپورت ارەنالارىنداعى بارلىق جەتىستىكتەرىنە ءسىزدىڭ قوسقان ۇلەسىڭىز زور. بىزدەر - قازاقستان ۇلتتىق قۇراماسىنىڭ مۇشەلەرى اشحابادتا ءوتىپ جاتقان ويىنداردا ءتول تۋىمىزدىڭ بيىكتە ءجيى جەلبىرەۋى ءۇشىن بار كۇش-جىگەرىمىزدى سالامىز»، - دەدى قازاقستان قۇراماسىنىڭ كاپيتانى.
نۇرسۇلتان نازاربايەۆ مەملەكەت تاراپىنان ەلىمىزدە سپورتپەن شۇعىلدانىپ، سالاۋاتتى ءومىر سالتىن ۇستانۋعا بارلىق جاعداي جاسالىپ جاتقانىن ايتىپ، سالاۋاتتى ۇلت قالىپتاستىرۋ ءۇشىن وتاندىق اتلەتتەرىمىزدىڭ جەتىستىكتەرى ماڭىزدى ەكەنىن اتاپ ءوتتى.
«قازاقستاننىڭ بارلىق وڭىرىندە ءتۇرلى سپورت نىساندارى سالىنۋدا، اتلەتتەرىمىز جوعارى دەڭگەيدەگى سايىستارعا قاتىسۋدا. ارالارىڭىزدا جەتىستىكتەرگە جەتكەن ايگىلى سپورتشىلار بار. ءبىزدىڭ جاستارىمىز - دارىندى. جىل سايىن سپورتتا جاڭا ەسىمدەر شىعىپ جاتىر. جالپى، جاس جەتكىنشىكتەر سىزدەردىڭ جەڭىستەرىڭىزگە قاراپ، سپورتپەن شۇعىلدانۋعا ۇمتىلاتىن بولادى. ول سالاۋاتتى ۇلت قالىپتاستىرۋدىڭ باستى شارتى بولىپ سانالادى. سىزدەر وسكەلەڭ ۇرپاققا ۇلگى بولۋلارىڭىز كەرەك»، - دەدى قازاقستان پرەزيدەنتى.
سونداي-اق قازاقستاندىق جەڭىل اتلەت، لوندونداعى وليمپيادا ويىندارىنىڭ چەمپيونى جانە بەيجىڭ مەن ريو-دە-جانەيروداعى وليمپيادا ويىندارىنىڭ قولا جۇلدەگەرى ولگا رىپاكوۆا ءسوز سويلەپ، ەلباسىنا العىس ايتتى.
«جۇمىس كەستەڭىزدىڭ تىعىزدىعىنا قاراماستان بىزگە قامقورلىق پەن قولداۋ كورسەتىپ جاتقانىڭىز ءۇشىن سىزگە بارلىق سپورتشىلارىمىزدىڭ اتىنان زور العىسىمىزدى ايتۋعا رۇقسات ەتىڭىز. ءسىز بىزبەن كەزدەسىپ اڭگىمەلەسۋگە، اق تىلەگىڭىزدى ايتىپ، باتاڭىزدى بەرۋگە ءاردايىم ۋاقىت تاباسىز. ءبىز ءوزىمىزدى تەك جاقسى قىرىمىزدان تانىتىپ، ءسىزدى جانە بارشا قازاقستاندىق جانكۇيەرلەردى قۋانتۋعا بارىمىزدى سالامىز»، - دەدى ولگا رىپاكوۆا.
سوڭىندا مەملەكەت باسشىسى قازاقستانداعى ميلليونداعان جانكۇيەر سپورتشىلارىمىزدىڭ تابىستى ونەر كورسەتەتىنىنە سەنىمدى ەكەنىن ايتىپ، ولاردىڭ جارىستى ءساتتى باستاپ، ايقىن جەڭىسكە جەتۋىنە تىلەكتەستىگىن ءبىلدىردى.
