15:20, 17 - قىركۇيەك 2017 | GMT +6
قازاقستان پرەزيدەنتى گەننادي گولوۆكينگە جەدەلحات جولدادى
استانا. قازاقپارات - قازاقستان پرەزيدەنتى نۇرسۇلتان نازاربايەۆ گەننادي گولوۆكينگە جەدەلحات جولدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى امەريكا قۇراما شتاتتارىنداعى لاس- ۆەگاستا وتكەن WBA، WBC، IBO، IBF جانە The ring تۇجىرىمدارى بويىنشا بوكستان الەم چەمپيونى اتاعى ءۇشىن جەكپە-جەك اياقتالعان سوڭ گەنناديي گولوۆكينگە جەدەلحات جولدادى.
«ميلليونداعان قازاقستاندىقتار ساعان ءبىر اۋىزدان قىزۋ قولداۋ كورسەتتى. سەن تارتىستى ءارى جانكەشتى جەكپە-جەكتە ايرىقشا تاباندىلىق تانىتىپ، قاجىماس قايرات پەن اسقان شەبەرلىك كورسەتتىڭ.
سەنىڭ كاسىپقويلىعىڭ، زور قابىلەتىڭ، قول جەتكىزگەن ابىروي-بەدەلىڭ، ەڭ باستىسى - ءوز ىسىڭە شەكسىز ادالدىعىڭ كەلەشەكتەگى جارقىن جەڭىستەرىڭنىڭ كەپىلى بولا بەرسىن»، - دەلىنگەن جادەلحاتتا.
سوڭىندا نۇرسۇلتان نازاربايەۆ بوكسشىعا زور دەنساۋلىق جانە الداعى بەلەستەرىنە تابىس تىلەدى.
