قازاق مادەنيەتى شەتەلدە كەڭىنەن تانىستىرىلادى - عاني نىعىمەتوۆ
«مادەنيەت، ونەر، كينورەجيسسۋرا، ادەبيەت سالاسىنداعى شىعارمالاردىڭ (شەت تىلدەرىنە اۋدارۋ ءۇشىن) ءتىزىمى اياقتالۋعا جاقىن دەپ ايتۋعا بولادى.
بۇل ءتىزىم قازىرگى كەزدە قالىپتاستىرىلۋدا جانە جىل سوڭىنا دەيىن بەكىتىلەتىن بولادى. الداعى جىلى سىرتقى ىستەر مينيسترلىگى بۇل شىعارمالاردى الەمدىك ارەنەدا بەلسەندى تۇردە العا ناسيحاتتايتىن بولادى. بۇل ءوز كەزەگىندە الەمدىك قوعامداستىققا قازاقستاننىڭ مادەنيەتىن كەڭىنەن كورسەتۋگە مۇمكىندىك بەرەدى»، - دەدى ول استانادا رۋحاني جاڭعىرۋ تاقىرىبىنداعى حالىقارالىق عىلىمي-تاجىريبەلىك كونفەرەنسيادا تىلشىلەر ساۋالىنا جاۋاپ بەرۋ بارىسىندا.
وسى ورايدا ول بۇگىنگى كونفەرەنسيا اياسىندا ساراپشىلىق الاڭدا جاسالعان ۇسىنىستار تىڭعىلىقتى تالقىلاۋدان وتەتىنىن اتاپ ءوتتى.
«وسىندا بۇل سالانى جاقسى بىلەتىن شىعارمىشىلىقتىڭ زيالى قاۋىمىنىڭ، مادەنيەتتانۋدىڭ وكىلدەرى شاقىرىلدى. بۇل رەتتە بۇگىن مادەنيەت وكىلدەرى مەن بيلىك وكىلدەرى اراسىندا قاجەتتى كوپىردى قۇرىپ وتىرمىز. بيلىك تاراپى قوعامنىڭ بارلىق وتىنىمدەرىن جان-جاقتى ءتۇسىنۋى ءۇشىن ءبىزدىڭ ينستيتۋت بۇل الاڭدى قالىپتاستىرۋدا. اتاپ ايتقاندا، «رۋحاني جاڭعىرۋ» جوباسى قالاي جۇزەگە اسىرىلىپ جاتقاندىعى تۋرالى باق ارقىلى كەڭىنەن اقپارات بەرىلۋى كەرەك دەپ پايىمدايمىن»، - دەدى ع. نىعىمەتوۆ.
اۆتور: رۋسلان عابباسوۆ
