الاپات ايقاس
ءتىپتى، گەنانىڭ ءبىر شايقاسىن تاماشالاۋعا كەلگەندە ءبىر مينۋتقا تولار تولماس ۋاقىتتا قارسىلاسىن سۇلاتىپ سالىپ، اپتىعىمدى سۋ سەپكەندەي باسىپ، قۇمارىم تويماي قايتقان كەزىم دە بولعان. بۇل جايىندا مەن سىزدەرگە بايانداعان بولاتىنمىن. اۋەلى گەننادي جىگىتىمىزگە ءوزىمسىنىپ وكپەمدى دە ءبىلدىرىپ ەدىم. سوناۋ جەردەن ساعىنىپ كەلگەندە الدىمدا ءبىراز ويقاستاپ، قارسىلاسىڭدى ارى- بەرى تومپەشتەپ جۇرە تۇرماعانىنا دا كەيىگەنمىن.
ءيا، ول وتكەن ءىس. ال، بۇگىنگى ايقاس ودان دا جوعارى. مەن وتكەندە ۇشاققا مىنبەي تۇرىپ، «كورگەن دە ارماندا...» ، - دەپ كولەمدى ماقالامدى جاريالاپ كەتكەن ەدىم. راسىمەن دە كورگەندە، كورمەگە دە ارماندا بولارى حاق. قازاق اتام قالاي قيىستىرىپ ايتقان دەسەڭىزشى؟! ءدال وسى ءسوزدىڭ بۇگىنگى ءبىزدىڭ تاقىرىبىمىزعا ارقاۋ بولعانىنا تاڭعالامىن. ءبىر- بىرىنە قابىسىپ، ءبىر- ءبىرىن تولىقتىرىپ تۇرعانداي. ويتكەنى گەننادي گولوۆكين مەن ساۋل الۆارەستىڭ شايقاسىن بۇكۇل دۇنيە ءجۇزى توسىپ وتىر. وسى كۇللى الەم توسقان عاسىر جەكپە- جەگىن كورگەن دە ارماندا، كورمەگەن دە ارماندا ەمەس پە؟ ولاي بولسا الاپات شايقاستى كورۋ ماعان بۇيىرعان ەكەن. مەن كورىپ ارماندا قالايىن، ال كورمەي قالعان اعايىن بولسا، ول دا ارماندا ءجۇرسىن.
سونىمەن لاس- ۆەگاس سول باياعى قالپى، ءتۇرلى ءدۇبىردى باسىنان وتكەرىپ، قاربالاسىپ جاتقان ەل. سوناۋ 2015 -جىلدان بەرى سوزباقتاپ كەلە جاتقان «گولدەن بوي پرومۋشەن» كومپانياسى تاعى قانداي سىيلىق دايىنداپ وتىر. مىنە، بۇگىنگى اڭگىمە وسى جايلى بولماق. الۆارەس پەن گولوۆكيننىڭ اراسىنداعى جەكپە- جەگىن نە سەبەپتى سوزىپ كەلگەنى تۋرالى وتكەن ماقالامدا جازعان بولاتىنمىن. ەندىگى جەردە الدىمنان نە كۇتىپ تۇر وسى جايىندا بولماق.
تەمىردى قىزعان كەزىندە سوق. ايگىلى كومپانيا ەكى مىقتىنىڭ اراسىنداعى كەزدەسۋدى تولىقتاي موينىنا العان. ولار كاسىپقوي بوكستى وتكىزۋدىڭ جانە سول ارقىلى مول تابىس تابۋدىڭ ءتۇرلى جولدارىن بىلەتىن كومپانيا. بۇعان دەيىن دە قىرۋار قاراجاتتىڭ استىندا قالعان كومپانيا ايتۋلى ءىستى تىندىرماقشى. مىناداي تىڭ اقپاراتتارمەن بولىسپەكشىمىن. ماسەلەن، تىكەلەي تاراتىلاتىن تەلە ارنالاردان باسقا ينتەرنەت جەلىسى ارقىلى تاراتىلاتىن «PІPIBI» دەگەن كورسەتىلىم شىققان. ول نە؟
ەندى تارقاتىپ ايتايىن. ول ارنايى قۇرىلعى. سول كۇنگى كەزدەسۋدى ۇيىڭدە وتىرىپ تامشالايسىڭ. ونىڭ ارنايى پاكەتى بولادى. شامامەن قۇنى 100 دوللارعا دەيىن تۇرادى. اتالعان قارجىنى تولەسەڭىز بولعانى، ۇيىڭىزگە اكەلىپ قوندىرعىنى ورناتىپ بەرەدى. سوندا ءسىز بولىپ جاتقان جەكپە- جەكتىڭ ورتاسىندا وتىرعانداي ۇيىڭىزدەن- اق تاماشالاي الاسىز. كەزىندەگى ساۋل مەن م. كوتتانىڭ شايقاسىندا 900 مىڭداي «PІPIBI» ساتىلىمى ىسكە اسقان. ال كانەلا مەن مەيۆەزەردىڭ اراسىنداعى جەكپە- جەكتە 2,5 ميلليون ساتىلىم بولعان. كەشەگى مەيۆەزەر مەن پاكياونىڭ اراسىندا 5,5 ميلليون ساتىلىمعا شىققان. ەندى وسى 5,5 ميلليوندى ورتا ەسەپپەن 100 دوللاردان ەسەپتەپ كورىڭىز قانشا دوڭگەلەك بولاتىنىن.
وسىدان- اق، بايقاۋعا بولادى كاسىپقوي بوكستا قىرۋار اقشانى سۋشا ساپىرىپ، مىقتىلاردىڭ توبەلەسىنە كومپانيالاردىڭ مۇددەلى ەكەنىن بىلۋگە بولادى. كەزىندە ءبىزدىڭ گولوۆكينگە وسكار دەلاحويا كوپ قارجى بەرگىسى كەلمەدى. ونىڭ ايتۋىنشا 10 پايىزىن گولوۆكين السىن، قالعان 90 پايىزدى ساۋل السىن دەگەن. وعان گەنا كەلىسپەدى. ودان كەيىن 10 ميلليون دوللار ۇسىندى وعان دا كەلىسپەدى. سول كەزدەگى گولوۆكين قاشىپ ءجۇر دەگەن اڭگىمەنىڭ شىعۋ سەبەبى وسىندا. سونىمەن بۇگىنگى تاڭدا مەنىڭ ويىمشا 70-تە، 30 پايىز بولۋى كەرەك. بۇل جامان ەمەس. ارينە، ازداپ كوڭىلىڭە تيەدى. ءبىراق، اتام قازاقتىڭ تاعى ءبىر قاناتتى ءسوزى بار «قازانشىنىڭ ءوزى ەركى، قايدان قۇلاق شىعارسا»، - دەگەن. جارىستى ۇيىمداستىرۋشى «گولدەن بوي پرومۋشەن» ءوزى ءبىلىپ جاتىر قازىر. ونىڭ سىرتىندا جاڭاعى مەن ايتقان ساتىلىمنان دا ءبىزدىڭ گەناعا قوسىمشا قارجى تۇسەتىن بولۋ كەرەك. بۇل شايقاس ا ق ش- تىڭ ءتورت جۇزدەي كينو تەاترىندا ارنايى ۇيىمداستىرىلىپ، ەكراننان كورسەتىلەتىن بولادى.
ەندى 15 - قىركۇيەك كۇنى جۋرناليستەردىڭ قاتىسۋىمەن ەكى بوكسشى سوڭعى رەت سالماقتارىن ولشەيدى. ول «ديەۆيد كوپەرفيلد» تەاترىندا وتەدى. ول بىتكەننەن كەيىن «MGM» گراند وتەلىنىڭ ارناۋلى زالىندا ەكى بوكسشىنىڭ باپكەرلەرىمەن بىرلەسىپ باسپا ءسوز ءماسليحاتى وتەدى. ول جايىندا الداعى ۋاقىتتا باياندايتىن بولامىن.
ودان كەيىن بوكسشىلارعا ارنالعان تورتتىك كيىم دايىندالعان ەكەن. ەلدەن كەلگەسىن، گەناعا جانكۇيەر بولعاسىن مەن دە ءبىر كيىمدى الۋعا نيەت ءبىلدىردىم. وكىنىشكە وراي ول ءىسىم ويعا اسپادى. نەگە دەسەڭىزدەر، ونداي تورتتىك كيىم ارنايى ساتىلىمعا شىققان بيلەتتەرمەن بىرگە بەرىلەدى ەكەن. ول بيلەتتىڭ قۇنى 8 مىڭ دوللار. ءبىزدىڭ تەڭگەمەن شاققاندا 2,5 ميلليون تەڭگە بولۋ كەرەك شاماسى. ەگەر ءسىز سول قىمباتتىق بيلەتتى ساتىپ الساڭىز ارنايى اۋەجايدان ۇزىندىعى ەسىك پەن توردەي بولاتىن ادەمى كولىكپەن توسىپ الىپ، قىمبات قوناقۇيگە ورنالاستىرىپ، جاڭاعى مەن ايتقان كيىمدى قوسا بەرىپ، ارناۋلى ورىنعا وتىرعىزادى. ارينە، وعان ءبىزدىڭ شامامىز جەتپەيدى. جۋرناليست دەگەن قاراپايىمدىلىعىمىز تاعى بار، اقپارات ءۇشىن بۇل دا كەرەك دەپ، ارى قاراي تىڭ دەرەكتەردى ىزدەستىرىپ جۇرە بەردىم.
ال جارنامالار ونشالىقتى كوپ ەمەس. جارق- جۇرق ەتكەن تەلە ەكرانداردىڭ بارلىعىنان كورسەتىپ جاتىر دەپ ايتۋعا كەلمەيدى. ءبىراق «MGM» گرانت وتەلىنىڭ قاسىندا، شايقاس بولاتىن عيماراتتىڭ جانىندا ۇلكەن سۋرەتتەرى ءىلىنىپ تۇر. مۇنىمەن قوسا كاسىپقوي بوكستا وزىندىك ورنى بار، جىلىگىن شاعىپ، مايىن ىشكەن بوكسشىلار وزدەرىنىڭ بولجامدارىن دا جاساپ ۇلگەرىپتى. تالاي الاپات ايقاستىڭ ورتاسىندا ءجۇرىپ ىسىلعان، ەلۋدەي كەزدەسۋ وتكىزىپ بارلىعىندا دا جەڭىسكە جەتكەن، كاسىپقوي بوكستىڭ ماڭداي الدى جارىق جۇلدىزدارىنىڭ ءبىرى كىشى فلويد مايۆەزەردىڭ جاساعان بولجامى ءبىزدىڭ جۇرەگىمىزگە قانجارداي بولىپ قادالدى. ارينە، ەلدەن كەلگەسىن، گەنانىڭ جانكۇيەرى بولعاسىن اۋىر تيەتىنى انىق. ول بىلاي دەيدى:
«كوپتەن كۇتكەن شايقاس بۇل. ادەمى تارتىستى كەزدەسۋ بولادى، سول جەكپە- جەكتە ساۋل الۆارەس گەننادي گولوۆكيندى ناكاۋدقا تۇسىرەدى»، - دەيدى. ونى نەگە بايلانىستى ايتىپ وتىرعانىن ءبىز دە سارالاپ كوردىك. ءبىر كەزدە الەمنىڭ بوكس ماماندارى گەنا مەن مايۆەزەر شارشى الاڭدا كەزدەسۋى كەرەك، ءبىرى سالماعىن ءتۇسىرۋى كەرەك، ەكىنشىسى كوتەرۋى ءتيىس، سول ارقىلى كىم مىقتىنى انىقتاعان ءجون دەگەن. سول كەزدە گەنا بولسا بولار دەپ يشارا تانىتىپ، مەن ونداي ايقاسقا دايىنمىن، جۇدىرىقتاسام دەگەن قارسىلاسىم قورقىپ قالماي ما ەكەن دەگەن ەدى. ال مەيۆەزەر جاۋاپ ايتپاعان. ونىڭ جاۋاپ بەرمەۋىنىڭ ارعى جاعىندا مەنسىنبەگەندىك ءبىلىندى. سول كەزدەگى گەنانىڭ ءسوزى شامىنا تيسە كەرەك، ساۋلعا جاقتاسۋىنىڭ باستى سەبەبى دە وسى بولار دەپ ىشتەي شەشتىك.
ارينە، ءالىپتىڭ ارتىن باعايىق. شىن مىقتىنى جەكپە- جەك وتكەننەن كەيىن انىقتايتىن بولامىز. ازىرگە مەن كەلگەن كۇننەن بەرى قولىم جەتكەن اقپارات وسىنداي. الدا ءالى تالاي قىزىق بار، توسىن سىي دا بولىپ قالار. ونى مەن كەلەسى حابارىمدا جولدايتىن بولامىن.
نەسىپ جۇنىسبايەۆ، بەلگىلى سپورت جۋرناليسى، الماتى وبلىسىنىڭ قۇرمەتتى ازاماتى، ارنايى «جەتىسۋ» گازەتى ءۇشىن لاس- ۆەگاستان.
