قوعام قايراتكەرى: لاتىن ءالىپبيى - ينتەرنەتتى يگەرۋدى جەڭىلدەتەدى

الماتى. قازاقپارات - بۇگىن الماتى قالالىق قوعامدىق كەڭەسى قازاق ءتىلىنىڭ لاتىن الىپبيىنە كوشۋى تۋرالى جيىن وتكىزدى.

وتىرىستا كەڭەس مۇشەلەرى اتالعان جاڭالىققا قاتىستى ءوز پىكىرلەرىن ءبىلدىردى. قوعام قايراتكەرى، جازۋشى بەكنۇر قيسىقوۆتىڭ ايتۋىنشا، لاتىن قارپىنە كوشكەندە ەڭ الدىمەن زاماناۋي مودەلدى تاڭداۋىمىز كەرەك.

«الەمدە 2,5 ميلليارد ادام اعىلشىن تىلىندە سويلەيدى. اعىلشىن تىلىندە 26 ءارىپ بار، وندا ترانسكريپتسيا كوپ ءرول وينايدى. بۇل بولاشاقتىڭ تالابى. ونسىز دامۋ جوق. سوندىقتان بىزگە دە لاتىن ءالىپبيىنىڭ qwerty ۆەرسياسىنا كوشۋ كەرەك. ويتكەنى قازىر الەمدە ينتەرنەت بازاسى ۇلكەن ءرول وينايدى. ينتەرنەتتەگى بارلىق كودتار، حوستينگتەر بارلىعى لاتىن قارپىمەن بەلگىلەنەدى. الەم قازىر ينتەرنەتپەن ءومىر ءسۇرىپ جاتىر»، - دەدى ب. قيسىقوۆ.

فيلولوگ مامان پارلامەنت تىڭداۋىندا ۇسىنىلعان لاتىن ءالىپبيىنىڭ نۇسقاسىن ءالى دە زەرتتەي ءتۇسۋ كەرەك دەپ سانايدى. «دياكريتيكا، ديگراف ارقىلى لاتىن قارپىنە كوشۋ قيىن بولادى. ويتكەنى نەمىستەردىڭ ءوزى ءالىپبيىن قالىپتاستىرۋعا 100 جىل ۋاقىت جىبەرگەن. بۇل ءبىز ءۇشىن وتە ۇزاق ۋاقىت»، - دەدى ب. قيسىقوۆ.

ونىڭ ايتۋىنشا، لاتىن ءالىپبيى دۇنيەجۇزىندەگى 5 ميلليون استام قازاقتىڭ بىرىگۋىنە ىقپال ەتەدى. «سىرتتاعى 5 ميلليون قازاعىمىز، توتە جازۋدى قولداناتىن قىتايداعى قانداستارىمىزدى قوسپاعاندا لاتىن ءالىپبيىن پايدالانادى. لاتىن ءالىپبيى - دۇنيەجۇزى قازاقتارىنىڭ ينتەگراتسيالانىپ، قارىم-قاتىناسىن كۇشەيتەتىن فاكتور»، - دەدى ول.

ايتا كەتەيىك، ق ر پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن جۇزەگە اسىرۋ اياسىندا پارلامەنت تىڭداۋىندا قازاق ءتىلىنىڭ لاتىن گرافيكاسىنداعى ءالىپبي جوباسى ۇسىنىلعان بولاتىن.

اۆتور: گۇلميرا عوسمانالي