رەسەي سيفرلىق ەكونوميكاعا كوشۋدە قازاقستانمەن قاتار جۇرگەندى قالايدى
بۇل تۋرالى استاناداعى سيفرلاندىرۋ ماسەلەلەرى بويىنشا رەسپۋبليكالىق كەڭەس بارىسىندا رەسەيدىڭ بايلانىس جانە بۇقارالىق كوممۋنيكاتسيالار ءمينيسترى نيكولاي نيكيفوروۆ ءمالىم ەتتى، دەپ حابارلايدى قازاقپارات.
«ءبىزدىڭ ەكونوميكالاردى سيفرلاندىرىپ جاتقان نەگىزگى تەحنولوگيالاردى ەكى ەل بىرلەسكەن تۇردە ىسكە اسىرۋى ءتيىس دەپ پايىمدايمىن. بۇل تۇرعىدا ۇلكەن مالىمەتتەردى قامتيتىن تەحنولوگيالار، ۇلەستىرىلگەن رەستردىڭ تەحنولوگيالارى، جاساندى ينتەللەكت، روبوتتار، سەنسورلار جانە باسقا دا ماڭىزدى باعىتتاردى قامتۋ كەرەك. ءبىزدىڭ كۇش-جىگەردى بىرىكتىرە وتىرىپ، بۇل تەحنولوگيالاردى بىرگە جاساۋعا ءمان بەرۋىمىز قاجەت. سەبەبى قازاقستاننىڭ جانە رەسەيدىڭ ەكونوميكالارىن سيفرلاندىرۋ باسقا دا شەتەلدىك ونىمدەرمەن شەكتەلمەي، ءوزىمىزدىڭ تەحنولوگيالارمەن قامتىلۋى ءتيىس»، - دەدى رەسەيلىك مينيستر.
ونىڭ سوزىنە قاراعاندا، سيفرلاندىرۋ مالىمەتتەر مەن بىلىمگە، ياعني ادامعا نەگىزدەلگەن ەكونوميكا بولىپ تابىلادى. سوندىقتان دا ونىڭ اياسىندا ادامي كاپيتالعا كوپ ءمان بەرگەن دۇرىس.
وسى ورايدا مەكتەپتەگى، جوعارى وقۋ ورنىنداعى جۇيەنى اۋىستىرۋ قاجەت بولىپ تۇر. نيكيفوروۆتىڭ پايىمىنشا، بۇل ماسەلەدە قازاقستان ساياسي باتىل قادامداردى تانىتىپ وتىر.
«قازاقستاننىڭ جانە رەسەيدىڭ اۋماعى ۇلكەن ەكەنى بەلگىلى. سونىمەن قاتار ادامدار سانى از ەلدىمەكەندەر دە بارشىلىق. بۇل ءوز كەزەگىندە قازىرگى زامانعى بايلانىستىڭ ءوزىن قامتاماسىز ەتۋ ءۇشىن قوماقتى ينفراقۇرىلىمدىق شىعىنداردى جۇمساۋدى قاجەت ەتەدى»، - دەيدى مينيستر.
بۇدان بۇرىن حابارلانعانداي، بۇگىن سيفرلاندىرۋ ماسەلەسىنە ارنالعان رەسپۋبليكالىق كەڭەستە ەلباسى نۇرسۇلتان نازاربايەۆ سيفرلاندىرۋ جونىندە قازاقستان، رەسەي جانە بەلارۋس اراسىندا بىرلەسكەن كوميسسيا قۇرۋ قاجەتتىگىن اتاپ ءوتتى.
«باستاماشى ءوزىم بولعان ەۋرازيالىق ەكونوميكالىق وداقتامىز. رەسەي، قازاقستان جانە بەلارۋس كۇش بىرىكتىرە وتىرىپ، كوميسسيا جانە بىرلەسكەن باعدارلاما قۇرۋدى ۇسىنامىن. ە ا ە و- نىڭ باسقا مۇشەلەرىن رەنجىتكىم كەلمەيدى. ولار دا قوسىلا الادى. ءبىراق ءبىز ءبىرىنشى كەزەكتە سيفرلاندىرۋ بويىنشا كوميسسيا قۇرىپ، ىلگەرىلەتۋىمىز كەرەك. ويتكەنى، ءارتۇرلى تاجىريبە بار. ءبىز ولاردى ءبىر-بىرىمىزبەن ءبولىسىپ، كومەكتەسە الار ەدىك. ماماندار دا بار»، - دەدى قازاقستان پرەزيدەنتى.
اۆتور: رۋسلان عابباسوۆ
