نۇرسۇلتان نازاربايەۆتىڭ توراعالىعىمەن قازاقستاندى سيفرلاندىرۋ ماسەلەسى تالقىلانادى

استانا. قازاقپارات - بۇگىن ەلوردادا ەلباسى نۇرسۇلتان نازاربايەۆتىڭ توراعالىعىمەن سيفرلاندىرۋ ماسەلەسىنە ارنالعان رەسپۋبليكالىق كەڭەس وتەدى، دەپ حابارلايدى قازاقپارات.

شارانىڭ ەلىمىزدىڭ اقپارات جانە كوممۋنيكاتسيالار مينيسترلىگى «زەردە» ۇلتتىق ينفوكوممۋنيكاتسيالىق حولدينگى» ا ق- ىمەن بىرگە ۇيىمداستىرۋدا. شارا اياسىندا كورمە اشىلىپ، وندا مەملەكەتتىك ورگانداردىڭ، وتاندىق كومپانيالار مەن ۇيىمداردىڭ ءتۇرلى باعىتتارداعى 30-دان استام ІТ- جوبالارى ۇسىنىلادى. كەڭەس بارىسىندا ۇكىمەت مۇشەلەرىنىڭ بارلىعى دەرلىك ءسوز سويلەپ، وزدەرىنە باعىنىشتى ۆەدومستۆودا سيفرلىق جوبالاردى جۇزەگە اسىرۋ بارىسىمەن تانىستىراتىن بولادى. مۇنان بولەك، ق ر ۇكىمەتىنىڭ سيفرلاندىرۋ باعدارلاماسىن جۇزەگە اسىرۋداعى ستراتەگيالىق سەرىكتەستى BCG « مەملەكەتتەردىڭ تەحنولوگيالىق كوشباسشىلىق ءۇشىن جاھاندىق باسەكەلەستىگى» تاقىرىبىندا بايانداما جاسايدى دەپ كۇتىلۋدە.

 جالپى كەڭەسكە اكت سالاسىنداعى حالىقارالىق ساراپشىلار، مەملەكەتتىك ورگانداردىڭ باسشىلارى، وتاندىق جانە شەتەلدىك كورپوراتسيالاردىڭ وكىلدەرى، الەمنىڭ 10-نان استام ەلىنەن اكت سالاسىنىڭ كومپانيالارى شاقىرىلعان. ايتا كەتەرلىگى، بۇگىن تۇستەن كەيىن اكت سالاسىنداعى حالىقارالىق ساراپشىلار، مەملەكەتتىك ورگانداردىڭ باسشىلارى، وتاندىق جانە شەتەلدىك كورپوراتسيالاردىڭ وكىلدەرى، اكت كومپانيالارىنىڭ قاتىسۋىمەن جالپى سەسسيا وتەدى. وندا سيفرلىق ەكونوميكاعا كوشۋ، ستارتاپ ەكوجۇيەنى دامىتۋ، سونىمەن قاتار سيفرلىق قىزمەتتەردى ەنگىزۋ ماسەلەلەرى تالقىلانادى. جاڭادان اكت- ستارتاپتاردى باستاۋشىلار مەن كاسىپكەرلەر ءۇشىن شەبەرلىك ساباقتارىن وتكىزۋ دە جوسپارلانعان.

 اۆتور: مارلان جيەمباي