بيىل استىق ساپاسى وتە جوعارى

استانا. قازاقپارات - بيىل استىق ساپاسى وتە جوعارى. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرگەن ق ر اۋىل شارۋاشىلىعى ءبىرىنشى ۆيتسە- ءمينيسترى قايرات ايتۋعانوۆ ءمالىم ەتتى، دەپ حابارلايدى قازاقپارات.

 ونىڭ ايتۋىنشا، جىل سايىن ەلىمىزدە كۇزگى جيىن- تەرىمگە 60 ميلليارد تەڭگە قارجى بولىنەدى. وتكەن جىلى بۇل قاراجات ديقاندارعا 10 پايىزبەن، ال بيىلدان باستاپ 6 پايىزبەن بەرىلدى. بۇعان قوسا، اعىمداعى جىلى تۇقىم ساپاسى جاقسارىپ، ءونىم ءتۇسىمى 1-2 ەسەگە ۇلعايدى. سونىمەن قاتار ەگىستىك القاپتارىنا سەبىلەتىن تىڭايتقىش كولەمى دە ارتتا تۇسۋدە. ماسەلەن، وتكەن جىلى شارۋالارعا 260 مىڭ توننا تىڭايتقىش جەتكىزىلسە، وسى جىلى ولار 1,5 ەسە ارتىق ساتىپ الىپ وتىر.

 «مۇنىڭ بارلىعى استىق ساپاسىنا اسەر ەتۋدە. قازىرگى ۋاقىتتا ايماقتاردىڭ دەرەگىنشە، باستىرىلعان استىقتىڭ 76 پايىزىنىڭ ساپاسى 3 ساناتتا بولۋدا. وتكەن جىلى ول جىلدىڭ سوڭىندا 44 پايىز بولعان ەدى. سالىستىراتىن بولساق، ساپا 1,5-2 ەسەگە وزگەرۋدە. بيىل استىق ساپاسى وتە جوعارى»، - دەدى قايرات ايتۋعانوۆ.

 بۇعان دەيىن حابارلاعانىمىزداي، رەسپۋبليكا بويىنشا 11,6 ميلليون گەكتار القاپتىڭ استىعى جينالىپ، 14,7 ميلليون توننا ءداندى داقىل باستىرىلدى. ەگىن جيناۋ ناۋقانى بىلتىرعى جىلدىڭ وسى ۋاقىتىمەن سالىستىرعاندا، 2,4 ميلليون گەكتارعا نەمەسە 16 پايىزعا ارتىق.

اۆتور: مارلان جيەمباي