ەنەرگەتيكا مينيسترلىگى قازاقستانداعى بەنزين باعاسىنىڭ ءوسۋ سەبەبىن ءتۇسىندىردى

استانا. قازاقپارات - بۇگىن ەلىمىزدىڭ ەنەرگەتيكا مينيسترلىگى بەنزين باعاسىنىڭ كوتەرىلۋ سەبەبىن ءتۇسىندىرىپ بەردى، دەپ حابارلايدى قازاقپارات.

 «رەسەيلىك بەنزين مەن ديزەل وتىنىنا تاۋەلدىلىك ساقتالۋدا. ا ي-92 ماركالى بەنزيننىڭ 30، ديزەل وتىنىنىڭ 15 پايىزىن سىرتتان الامىز. ءوز كەزىندە زاۋىتتار اقشىل ءتۇستى مۇناي ونىمدەرىن ءوندىرۋ كولەمىن ارتتىرۋ بويىنشا جۇمىستارىن جالعاستىرۋدا. جىل باسىنان بەرى ءبىز 10 ميلليون 345 مىڭ توننانى وڭدەدىك. بۇل وتكەن جىلدىڭ سايكەس كەزەڭىمەن سالىستىرعاندا 104 پايىزدى قۇرايدى»، - دەدى ق ر ەنەرگەتيكا مينيسترلىگى مۇناي ونەركاسىبىن دامىتۋ دەپارتامەنتىنىڭ ديرەكتورى قۋانىش قۇدايبەرگەنوۆ.

 ونىڭ ايتۋىنشا، رەسپۋبليكاداعى مۇناي وڭدەۋ زاۋىتتارىنىڭ جوسپارلى جوندەۋ جۇمىستارى بار.

 «كەستەگە سايكەس زاۋىت جىلىنا ءبىر رەت توقتاتىلادى جانە ءدال قازىرگى ۋاقىتتا اتىراۋ زاۋىتى تامىز ايىنان باستاپ 18 - قىركۇيەككە دەيىن 1 اي جوندەۋگە توقتاتىلدى. 20 - قىركۇيەكتەن باستاپ 25 - قازانعا دەيىن پاۆلودار زاۋىتى توقتايدى. اتالعان زاۋىتتار وندىرمەيتىن كولەمدى ءبىز رەسەيدەن الۋىمىزعا تۋرا كەلەدى. رەسەيمەن شەكاراداعى باعا ر ف- نىڭ ەكسپورتتىق باتىس باعىتىمەن باسەكەلەس بولۋى قاجەت»، - دەدى ول.

 ونىڭ دەرەگىنشە، قازىرگى ۋاقىتتا ر ف- مەن شەكارادا ديزەل وتىنىنىڭ 1 تونناسى 501، بەنزيننىڭ 1 تونناسى 525 دوللاردى قۇراپ وتىر.

 «مۇنىڭ بارلىعى دا سوڭىندا جانارماي قۇيۋ ستانساسىنداعى يمپورتتالعان رەسەيلىك بەنزيننىڭ باعاسىنا ىقپال ەتەدى. ول قازاقستاندىق بەنزيننەن ءبىرشاما جوعارى. ادەتتە جانارماي قۇيۋ ستانسالارىنداعى بەنزيننىڭ 70 پايىزى وتاندىق، ال 30 پايىزى رەسەيلىك بولىپ كەلەدى جانە وسى تەڭگەرىمنەن ورتاشا باعا شىعاتىن. قازىرگى ۋاقىتتا رەسەيلىك جانارمايدىڭ ۇلەسى ارتىپ، ورتاشا باعا دا ءبىرشاما ءوستى. دەگەنمەن، بۇل اۋىتقۋ ماۋسىمدىق سيپاتقا يە. ول سۇرانىستىڭ ارتۋىمەن جانە زاۋىتتاردىڭ توقتاۋىنا بايلانىستى ۇسىنىستىڭ شەكتەلۋىمەن بايلانىستى. قازان ايىنىڭ سوڭىندا تەڭگەرىم تۇزەلىپ، باعا تۇراقتالادى دەپ ويلايمىز»، - دەدى قۋانىش قۇدايبەرگەنوۆ.

اۆتور: مارلان جيەمباي