لاتىن ءالىپبيى ارقىلى ارتىق ەملە- ەرەجەدەن قۇتىلامىز - پروفەسسور

استانا. قازاقپارات - احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، پروفەسسور ءالىمحان جۇنىسبەكتىڭ ايتۋىنشا، قازاق ءتىلىن لاتىن الىپبيىنە تۇسىرگەننەن كەيىن ورىس تىلىنەن كىرىپ كەتكەن ونداعان ەملە- ەرەجەلەردە قۇتىلۋعا بولادى، دەپ حابارلايدى قازاقپارات ءتىلشىسى.

«قازاقتىڭ قازىرگى ءالىپبيىن «قازاق ءالىپبيى» دەپ ايتۋ قيىن. ول - قازاق- ورىس ءالىپبيى، تۋراسىن ايتساق، ورىس- قازاق ءالىپبيى. ويتكەنى ءالىپبيىمىزدىڭ جارتىسى - ورىس تىلىنەن ەنگەن تاڭبالار مەن دىبىستار. سودان ورىس ءتىلىنىڭ ەملە- ەرەجەلەرى دە كىرىپ كەتكەن. ەگەر ءبىز لاتىن الىپبيىنە كوشەتىن بولساق، وندا 40-50 باسى ارتىق ەملە- ەرەجەر وزىمەن- ءوزى ءتۇسىپ قالادى ەكەن. ماسەلە ورىس تىلىنە جانە ونىڭ ەملە- ەرەجەلەرىنە قارسىلىقتا ەمەس. توركىنى بولەك ورىس ءتىلىنىڭ ەملە- ەرەجەسى مەن تاڭبا- دىبىستارىن توركىنى بولەك قازاق ءتىلىنىڭ ەملە- ەرەجە مەن تاڭبا- دىبىستارىنا اكەلىپ، سونىڭ قانجىعاسىنا بايلاپ بەرگەنىمىز ارتىق تىرلىك بولدى. قۇتىلساق، سودان قۇتىلامىز. ورىس ءتىلى مەن ورىس الىپبيىنەن ەمەس» ، - دەدى ءالىمحان جۇنىسبەك بۇگىن استانادا وتكەن باسپا ءسوز ءماسليحاتىندا. عالىمنىڭ ايتۋىنشا، كۇنى كەشە ءالىپبيدىڭ ۇلتتىق جانە تەحنيكالىق نۇسقاسى ۇسىنىلعان بولاتىن. «پارلامەنت سونىڭ ەكىنشى نۇسقاسىن قابىلدادى. ينتەرنەت ءالىپبي، ياعني تەحنيكالىق ءالىپبيدىڭ وزىندىك ەرەكشەلىكتەرى بار. ۇتىمدى جاعى سول، قولدانىستاعى پەرنەتاقتامەن جۇمىس ىستەي بەرۋگە بولادى. ال ۇلتتىق ءالىپبيدىڭ جاقسى جاعى - ول ءتىلدىڭ ىشكى زاڭدىلىعىنا سۇيەنىپ جاسالادى، قيىندىق جاعى - كەيبىر تاڭبالارعا ارنايى باعدارلاما جاساۋعا تۋرا كەلەدى. ول قاراجاتپەن بايلانىستى. ەكى نۇسقانىڭ ايىرماشىلىعى وسى» ، - دەپ اتاپ كورسەتتى پروفەسسور ءالىمجان جۇنىسبەك.

ايتا كەتەيىك، كەشە قر پارلامەنت ماجىلىسىندە وتكەن تىڭداۋدا لاتىن ءالىپبيىنىڭ ءبىرىڭعاي نۇسقاسى تانىستىرىلدى. قازاق ءتىلىنىڭ جاڭا ءالىپبي جوباسى «ءبىر ءارىپ - ءبىر دىبىس» ، «ءبىر ءارىپ - ەكى دىبىس» جانە «ءبىر دىبىس» پرينتسيپىنە نەگىزدەلگەن. 25 تاڭبالى الفاۆيتتەن بولەك 8 ديگراف بار.

 

اۆتور: ارمان اسقاروۆ