جاريالانعان لاتىن ءالىپبيى سىناقتان ءوتۋى ءتيىس - ەرلان سىدىقوۆ
«قازاقستان رەسپۋبليكاسى پارلامەنتى ماجىلىسىندە وتكەن مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ جاڭا ستاندارتىنا قاتىستى تىڭداۋ مەن تالقىلاۋ وتە ماڭىزدى شارا دەپ بىلەمىن. ويتكەنى، ەلباسى ايقىنداعان رۋحاني جاڭعىرۋ اياسىندا الفاۆيتىمىزدى بۇگىنگى جاھاندىق سىن-قاتەرلەرگە توتەپ بەرەتىندەي ەتىپ قايتا قاراۋ، جۇيەلەۋ، تارازىلاۋ جانە بەكىتۋ - تاريحي ماڭىزدى ءسات»، - دەدى اكادەميك ەرلان سىدىقوۆ.
ونىڭ ايتۋىنشا، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى عالىمدارى، اسىرەسە ا. ءشارىپباي باستاعان «جاساندى ينتەللەكت» ينستيتۋتى مەن فيلولوگيا سالاسىنىڭ كافەدرالارى بۇل شاراعا ءبىرازدان بەرى ۇلەس قوسقان.
«قازاق ءتىلىنىڭ تابيعي بولمىس- ءبىتىمى، ەرەكشەلىگى، ىقپالداستىق جاعدايىنداعى دامۋ ۇدەرىسى تەوريالىق جانە پراكتيكالىق تۇرعىدان ابدەن تارازىلاندى. لاتىن حارپىنە 90-جىلداردان كەيىن وتكەن ازەربايجان، تۇرىكمەنستان، وزبەكستان تاجىريبەسى دە سالىستىرىلدى. الىپبيدەگى جاڭا باعىت نەسىمەن قۇندى؟ بىرىنشىدەن، قازاق الفاۆيتى بۇگىنگى اقپاراتتىق تەحنولوگيانىڭ بار مۇمكىندىگىن پايدالانۋعا باعىتتالعان. ەكىنشىدەن، كەڭەس تۇسىندا كۇشتەپ ەنگىزىلگەن جاساندى قاعيداتتاردان قۇتىلۋ كوزدەلگەن. بۇل - تاۋەلسىزدىك تالابى ەكەنى تۇسىنىكتى»، دەدى ەرلان سىدىقوۆ.
عالىمنىڭ ايتۋىنشا، الدا دا ءالى جاۋاپتى جۇمىستار بار. «جاريالانعان لاتىن الىپبيى اپروباتسيادان (سىناقتان) ءوتۋى ءتيىس. ءتىل عىلىمىنىڭ مىڭ سان تالابى، ەرەجەلەرى بولادى - سونى وسى الفاۆيت اياسىندا ەلەكتەن وتكىزۋ كوزدەلىنگەن. مۇنى عالىمدارىمىز، ماماندارىمىز ابىرويمەن ورىندايدى دەپ سانايمىز. ەڭ باستىسى، ەل بىرلىگىنە جانە باياندى بولاشاققا قىزمەت ەتەتىن ءارىپ ءتۇرى (لاتىن) تاڭدالدى. قالعان جاۋاپكەرشىلىك - ءبىلىمدى دە بىلىكتى ازاماتتارىمىزدىڭ موينىندا. وسى جولدا ايرانداي ۇيىعان حالقىمىز سەنىم ۇدەسىنەن شىعارى ءسوزسىز»، - دەدى ەرلان سىدىقوۆ.
ەسكە سالا كەتسەك، كەشە پارلامەنتتىك تىڭداۋدا «ءبىر ءارىپ - ءبىر دىبىس»، «ءبىر ءارىپ - ەكى دىبىس» جانە «ءبىر دىبىس» پرينتسيپىنە نەگىزدەلگەن قازاق ءتىلىنىڭ جاڭا لاتىن نۇسقاداعى الىپبي جوباسى تانىستىرىلدى.
