ءبىلىم مينيسترلىگىنىڭ كەزەكتى رەفورماسى تاعى داۋ تۋعىزدى

استانا. قازاقپارات - قازاقستانداعى مەكتەپتەر بەس كۇندىك وقۋعا كوشۋدى باستادى.

بۇگىن پاۆلودار مەن قىزىلوردا وبلىسى جاڭا كەستەمەن وقۋعا كىرىستى.

ءبىراق، بۇل جۇيەنى جاتىرقاعاندار جەتەرلىك. وسى تاقىرىپتا اتا-انالاردىڭ پىكىرى ەكىگە جارىلدى. مينيسترلىك التى كۇندىك كەستەدەن ارىلدىق دەگەنمەن، بەس كۇندە وقيتىن پاندەردىڭ ءتىزىمى كوبەيگەن. بۇل تۋرالى ك ت  ك حابارلايدى.

قوسىلعىشتاردىڭ ورنىن اۋىستىرعانمەن، قوسىندىنىڭ ءمانى وزگەرمەيدى. وقۋشىلارعا بەس كۇن وقيمىز دەپ بورىكتەرىن اسپانعا لاقتىرۋعا ءالى ەرتە. ماسەلەن، الماتىداعى ءنومىرى 54- مەكتەپ- گيمنازياسى قوسىمشا ساباق، فاكۋلتاتيۆتەردى سەنبى كۇنگە كوشىرگەن. ال، مىندەتتى پاندەردى بەس كۇنگە ءبولىپ تاستاپتى.

«مىندەتتى پاندەردى بەس كۇنگە بولەتىن بولساق، كۇنىنە التى ساعاتتان شىعادى. جەتىنشى سىنىپتار تىپتەن كەي كۇندەرى جەتى ساباقتان وقيدى. سوعان سايكەس ساباق ۇزاقتىعى 40 مينۋتقا دەيىن قىسقارىپ وتىر"، - دەيدى №54 مەكتەپ- گيمنازياسى ديرەكتورىنىڭ ورىنباسارى ناتاليا پوپوۆا.

بەس كۇندىك وقۋ- اتا-انالار جينالىسىنداعى باستى تاقىرىپ. بالالارى وقيمىن دەپ زورىعىپ كەتپەسە دەپ الاڭداۋلى.

«التىنشى كۇننىڭ ساباعىن قوسۋ مەنىڭشە دۇرىس ەمەس. ەشقانداي بالا ساباقتى كوپ وقىعان سايىن پروفەسسور بولىپ كەتپەيدى» - دەيدى الماتى قالاسىنىڭ تۇرعىنى ەسىمبەك مۇقانوۆ.

«التى كۇننىڭ ساباعىن الىپ بەس كۇنگە سالعاننان نە پايدا؟ بالانىڭ قۇر ميىن اشىتۋ بولادى عوي. قازىر ءوزى بالانىڭ سانى دا كوبەيىپ كەتتى»، - دەيدى الماتى قالاسىنىڭ تۇرعىنى اسەت مۇحامەدجانوۆ.

مينيسترلىك بولسا اتا-انانى بوسقا داۋرىقپاۋعا شاقىرادى. ساباق ۇزاقتىعىن 40 مينۋتقا قىسقارتۋ ارقىلى 30 مينۋت ۇنەمدەلەتىنىن، سول ارقىلى وقۋشىلار ادەتتەگىدەن تەك 10 مينۋتقا عانا ارتىق وقيدى دەپ سەندىرىپ وتىر. ءبىراق، جوعارى سىنىپ وقۋشىلارى ءپاننىڭ كوپتىگىنە بايلانىستى، سەنبى كۇنى دە مەكتەپكە بارۋعا ءماجبۇر.

«بىزگە قيىندىق تۋعىزىپ وتىرعان جوعارى كلاستار. سوندىقتان، ولاردىڭ كەيبىر ساباقتارى سەنبىگە قالىپ وتىرادى. ال، باستاۋىش سىنىپتاردىڭ جۇكتەمەسى باياعىشا قالادى»، - دەيدى ق ر ب ع م مەكتەپكە دەيىنگى جانە ورتا ءبىلىم دەپارتامەنتى ديرەكتورىنىڭ ورىنباسارى زەينەپ ماقسۇتوۆا.

سارالاپ كورسەك، بەس كۇن وقۋ وزگە ەلدەردە بۇرىننان بار. ماسەلەن، ا ق ش، فينليانديا، يتاليا، نورۆەگيادا التى كۇن وقۋ اتىمەن جوق. تىپتەن، كورشى رەسەي دە وسى جۇيەنىڭ سوقپاعىنا تۇسكەن.

بەس كۇندىك وقۋعا ازىرگە ەلدىڭ تەك ەكى ءوڭىرى كوشىپ ۇلگەردى. قىزىلوردا مەن پاۆلودار وبلىسىنداعى 550 مەكتەپ بۇگىننەن باستاپ جاڭا كەستەنى بەكىتتى. ال قىركۇيەكتىڭ اياعىنا دەيىن قالعان وبلىستار دا وسى كوشكە قوسىلۋى كەرەك. ءبىلىم مينيسترلىگى جاڭا جۇيەنىڭ وقۋ جىلىنىڭ ۇزاقتىعى مەن دەمالىسقا اسەرى تيمەيدى دەيدى. الايدا، اتا-انالاردىڭ بۇل ۋادەدەن الاڭداۋشىلىعى ازايماي وتىر. بەس كۇندىك وزگەرىستىڭ بۇك يا شىك بوپ تۇسەتىنى ۋاقىتتىڭ ەنشىسىندە.