بەيسبول ماتچىندا بوي كورسەتكەن گولوۆكينگە جۇرت نارازىلىق ءبىلدىردى

استانا. قازاقپارات - لوس- اندجەلەستە «لوس- اندجەلەس دودجەرس» كاسىپقوي بەيسبول كلۋبىنىڭ «كولورادو روكيس» كومانداسىنا قارسى ويىنى ءوتتى.

ماتچ الدىندا دوپتى سالتاناتتى لاقتىرۋ ءراسىمىن قازاقستاندىق بوكسشى گەننادي گولوۆكين وتكىزدى. الايدا، «لوس- اندجەلەس دودجەرس» - تىڭ بارلىق دەرلىك جانكۇيەرلەرى گولوۆكيننىڭ الاڭدا پايدا بولۋىنا قۋانىشتى بولعان جوق، دەپ حابارلايدى قازاقپارات Sports.kz-عا سىلتەمە جاساپ.

«Dodger Stadium-دا GGG- گە ىسقىرىپ، نارازىلىق ءبىلدىرىلدى»، - دەپ جازدى Los Angeles Times تىڭ جەرگىلىكتى ءتىلشىسى تۆيتتەردە.

ايتا كەتەيىك، لوس-اندجەلەس حالقىنىڭ 47 پايىزىن لاتىنامەريكالىقتار قۇرايدى. ولاردىڭ دەنى گولوۆكين-الۆارەس جەكپە-جەگىندە مەكسيكالىق بوكسشىعا جانكۇيەر بولاتىنى داۋسىز.

ەسكە سالايىق، 16 -قىركۇيەكتە گەننادي گولوۆكين مەكسيكالىق بوكسشى ساۋل الۆارەسپەن جۇدىرىقتاسادى. وسى جەكپە-جەكتە الۆارەس GGG- دىڭ تەك ەكى اتاعى - WBA مەن IBF بەلبەۋلەرى ءۇشىن عانا تالاسادى. گولوۆكين ۇتىلىپ قالسا، ونىڭ تاعى ەكى بەلبەۋى - WBC مەن IBO بوس قالىپ، ونى باسقا بوكسشىلار ءوزارا ساراپقا سالادى.

ال قازاقستاندىق بوكسشى جەڭىسكە جەتسە، ءتورت بەلبەۋىنە تاعى The Ring جۋرنالىنىڭ ارنايى بەلبەۋىن قوسىپ الادى. اتالعان باسىلىم ونى ارنايى الۆارەس ءۇشىن شىعارعان بولاتىن.

ۋاقىت ايىرماشىلىعىنا بايلانىستى قازاقستاندا جەكپە-جەكتىڭ تىكەلەي كورسەتىلىمى 17 -قىركۇيەك كۇنى تاڭەرتەڭ كورسەتىلەدى.