استاناداعى «نۇرلى جول» ۆوكزالى ەكسپو كورمەسىن «شىعارىپ» سالدى - كەسكىن
9- قىركۇيەك كۇنى كەشكى ساعات 20:17 دە ۆوكزال ۇجىمى كورمەمەن قوشتاسۋ سالتاناتىن وتكىزدى، دەپ حابارلادى استانا اكىمدىگىنىڭ مەديا ورتالىعى.
«ەكسپو كورمەسى ەلىمىز ءۇشىن وتە ماڭىزدى شارانىڭ ءبىرى بولدى. اسىرەسە «نۇرلى جول» تەمىرجول ۆوكزالى ونىڭ وتۋىنە تىكەلەي اتسالىستى. وسىعان وراي تەمىرجول ۆوكزالىنىڭ ۇجىمى حالىقارالىق كورمەمەن قوشتاسۋ سالتاناتىن وتكىزدى. اشىلعان كۇننەن باستاپ ءبىزدىڭ ۆوكزال 2 ميلليونعا جۋىق جولاۋشىعا قىزمەت كورسەتتى. وسىنداي كەڭ اۋقىمداعى كورمەنى كوپ ادامنىڭ قولداعانىنا قۋانىشتىمىز»، - دەدى «نۇرلى جول» تەمىرجول ۆوكزالى كەشەنى ديرەكتورىنىڭ ورىنباسارى نۇرلان امانجولوۆ.
ۆوكزالدىڭ 40 قا جۋىق قىزمەتكەرى عيماراتتىڭ ورتالىق الاڭىنا جينالىپ شەرۋ وتكىزدى. اتالعان شاراعا ارنايى ءان جازدىرىلدى. سالتاناتتى شارانىڭ تۋرا ساعات 20:17 دە باستالۋى دا تەگىن ەمەس. «شاردان جاسالعان ەكسپو-2017 كورمەسىنىڭ بەلگىسىن ۇستاعان قىزمەتكەرلەر ۆوكزال ءىشىن ارالاپ، پەررونعا ءتۇستى. وسىلايشا ءبىز وزىمىزشە كورمەمەن قوشتاستىق»، - دەدى ن. امانجولوۆ.
ايتا كەتەيىك، «نۇرلى جول» تەمىرجول ۆوكزالى كورمە قارساڭىندا ارنايى اشىلعان بولاتىن. ول جىلىنا 12 ميلليون جولاۋشىعا قىزمەت كورسەتە الادى. كۇنىنە 35 مىڭ جولاۋشىنى قابىلداپ-شىعارىپ سالاتىن مۇمكىندىگى بار.
«كورمەدەن كەيىن ۆوكزال شتاتتىق رەجىمدە جۇمىس ىستەپ، ءارى قاراي دامي تۇسەدى. قىزمەتكەرلەرىمىزدىڭ 70 پايىزعا جۋىعى ءۇش ءتىلدى جەتىك مەڭگەرگەن جاستار. ولار بىلىكتىلىگىن كوتەرىپ، قىزمەت كورسەتۋ ساپاسىن ارتتىراتىن بولادى»، - دەدى ول.
