مەن الەم چەمپيونى بولماي توقتامايمىن - ايدوس ەربوسىن ۇلى
- استاناداعى بوكس كەشىنە تىڭعىلىقتى دايىندالعانىڭىزدى جەكپە-جەكتەن بايقادىق. قارسىلاسىڭىز ەش قاۋقار تانىتا العان جوق...
- ءيا، مەن كەز-كەلگەن جەكپە-جەككە وسىلاي جوعارى دايىندىقپەن كەلەمىن. دايىندىقسىز ءىس بىتپەيدى. -
ايقاستى ادەيى قىسقا ۋاقىت ىشىندە بىتىرگىڭىز كەلدى مە؟
- وسى جەكپە-جەكتىڭ الدىندا ازداپ جاراقات الىپ قالعان بولاتىنمىن. قازاقتا: «ءتۇن ۇزارسا، ءتۇس كوبەيەدى» دەگەن ماتەل بار ەمەس پە؟! ايقاستى سوزا بەرسەم جاراقاتىم سىر بەرىپ، جەڭىستى ۋىستان شىعارىپ الام با دەپ، وسىلاي ەرتەرەك اياقتاۋدى ءجون سانادىم.
- ءسىز جالپى ءار جەكپە-جەكتەرىڭىزدى ەرتە اياقتاپ كەلە جاتىرسىز. جانكۇيەرلەرىڭىزدىڭ مەيىرى قانباي قالىپ جۇرگەن جوق پا؟
- اركىمنىڭ قالاۋى ءار باسقا. بىرەۋگە قانشا رۋند بولسا، سونشا ۋاقىت جۇدىرىقتاسقان ۇنايدى. ال بىرەۋلەرگە رينگكە شىعا سالىپ، قارسىلاسىن سۇلاتىپ سالعان ۇنايدى. ءوز باسىم جارىستى ەرتەرەك اياقتاعاندى ۇناتام. ەگەر، 6,9,12 رۋندتىق ايقاستاردى اقىرىنا دەيىن جەتكىزۋ كەرەك بولسا، جانكۇيەرلەرىڭدى جالىقتىرىپ الماۋ جاعىن دا ويلاستىرۋ كەرەك.
- بۇل ءسىزدىڭ كاسىبي رينگتەگى جەتىنشى ايقاسىڭىز. جەتەۋىندە دە قارسىلاسىڭىزدى ايقىن باسىمدىلىقپەن ۇتتىڭىز. ەندى، تيتۋلدىق ايقاستارعا شىعۋدى قاي ۋاقىتتارعا جوسپارلاپ ءجۇرسىز؟
- ونىڭ اۋلى دا الىس ەمەس. بۇيىرسا الداعى ەكى جىلدىڭ ىشىندە الەم چەمپيونى اتانۋعا بار كۇش-جىگەرىمدى سالامىن. قازىر ءار ساعاتىم، ءار كۇنىم بەلگىلەنگەن جوسپار بويىنشا ءجۇرىپ جاتىر. جوسپاردىڭ باستى ماقساتى - الەم چەمپيونى اتانۋ. ءبىز سوعان كۇن ساناپ جاقىنداپ كەلەمىز. ءسال ۋاقىت كۇتىڭىزدەر...
- قازىر قايدا جاتتىعىپ ءجۇرسىز؟ قانات يسلامنىڭ كومانداسىمەن بىرگەسىز بە؟
- جوق، مەن قانات اعالاردان بولەك جاتتىعامىن. ءبىراق يسلامدى اعا رەتىندە قاتتى سىيلايمىن. ۇيرەنەرىم دە كوپ. ول ناعىز وتانشىل ازامات. وسىنداي اعالارىمىز كوپ بولسىن. ال مەن امەريكالىق «Fight Promotions» كومپانياسىنىڭ جەتەكشىلىگىندە جاتتىعىپ، جارىستارعا شىعىپ ءجۇرمىن.
- بۇل كومپانيادا قازاقتاردان تاعى كىم بار؟
- «Fight Promotions» - كاسىپقوي بوكستاعى تانىمال پروموۋتەرلىك ۇيىمداردىڭ ءبىرى. بۇگىندە بۇل كومپانيا كەلىسىمشارتى بويىنشا قازاقستاندىق دانيار ەلەۋسىنوۆتىڭ تۋعان اعاسى داۋرەن ەلەۋسىنوۆ بار. سونىمەن قاتار بۇرىن ءوزىم ونەر كورسەتكەن «Astana Arlans» كلۋبىندا ەل نامىسىن قورعاپ كەتكەن ۋكراينالىق سەرگەي دەريەۆيانچەنكو دا «Fight Promotions» جەتەكشىلىگىمەن شارشى الاڭعا شىعىپ ءجۇر. بولاشاقتا بىزدەن باسقا وتانداستارىمىز كەلۋى ابدەن مۇمكىن.
- بيىلعى جىل وسى استاناداعى جەڭىسىڭىزبەن اياقتادى ما، الدە الدا تاعى دا باسقا جەكپە-جەككە شىعاسىز با؟
- جەلتوقسان ايىندا تاعى ءبىر كەزدەسۋ وتكىزۋ جوسپاردا بار. ونى پروموۋتەرلەرىم شەشەدى.
- جالپى سپورتقا قاشان كەلدىڭىز، ايتا كەتسەڭىز...
- مەن الماتى وبلىسى جاركەنت اۋدانىندا دۇنيەگە كەلدىم. ءبىراق 10 جاسىمدا الماتى قالاسىنا كوشىپ كەلدىك. بۇل كوش مەنى سپورتپەن، سونىڭ ىشىندە بوكسپەن اينالىسۋعا مۇمكىندىك تۋدىردى. بىلعارى قولعاپتى 11 جاسىمنان باستاپ كيدىم.
- اڭگىمەڭىزگە راحمەت!
اۆتور: كۇنسۇلتان وتارباي
