ەردوعان بارشا مۇسىلمانداردى ميانماداعى شيەلەنىستى شەشۋگە شاقىردى

استانا. قازاقپارات - بۇگىن ەلوردادا باستالعان يسلام ىنتىماقتاستىعى ۇيىمنىڭ عىلىم جانە تەحنولوگيالار جونىندەگى ءبىرىنشى سامميتىندە تۇركيا پرەزيدەنتى رەدجەپ تايىپ ەردوعان بارشى مۇسىلمان مەملەكەتتەرىن ميانماداعى «ادامزات دراماسىن» رەتتەۋگە ۇندەدى، دەپ حابارلايدى قازاقپارات.

«ميانماداعى باۋىرلارىمىز قيىن جاعدايعا تاپ بولدى. ولار ءوز ۇيلەرىن تاستاپ كەتۋگە ءماجبۇر، جان-جاققا بوسىپ كەتتى. ءبىز وسى ءبىر ادىلەتسىزدىكتى بىرگە توقتاتۋىمىز قاجەت. بانگلادەش پەن ميانما ۇكىمەتتەرىمەن كەلىسە وتىرىپ، ول جەردەگى «ادامزات دراماسىن» شەشۋىمىز كەرەك. سەبەبى بانگلادەشكە قاشىپ بارعان مۇسىلماندار دا كومەككە ءزارۋ. ءبىز ولارعا كومەكتەسۋگە دايىن ەكەنىمىزدى جەتكىزدىك. ەندى، بارلىق مۇسىلمان مەملەكەتتەرى بىرىگىپ، ول جاقتاعى باۋىرلارىمىزعا قول ۇشىن سوزۋى قاجەت»- دەدى ەردوعان.

ايتا كەتەيىك، ءوز سوزىندە تۇركيا باسشىسى مۇسىلماندار اراسىنداعى ساۋاتسىزدىق جويۋ ماسەلەسىن دە كوتەردى. سەبەبى بۇگىندە الەم بويىنشا مۇسىلمانداردىڭ جارتىسى ساۋاتسىز. يسلام ىنتىماقتاستىعى ۇيىمى - 1969-جىلى 25- قىركۇيەكتە مۇسىلمان مەملەكەتتەرى باسشىلارىنىڭ راباتتا وتكەن كونفەرەنتسياسىندا نەگىزى قالانعان ەڭ ءىرى جانە ىقپالدى ۇكىمەتتىك ءارى حالىقارالىق مۇسىلمان ۇيىمى. قازىرگى ۋاقىتتا ول جالپى سانى شامامەن 1,5 ميلليارد ادامدى قامتيتىن 57 ەلدىڭ باسىن بىرىكتىرىپ وتىر.

ي ى ۇ- نىڭ نەگىزگى قاعيداتتارى مىنالار: تولىق تەڭدىك؛ ءار حالىقتىڭ ءوز تاعدىرىن ءوزى شەشۋ قۇقىعىنا دەگەن قۇرمەت؛ ىشكى ىستەرىنە ارالاسپاۋ؛ مەملەكەتتەردىڭ ەگەمەندىگىن، تاۋەلسىزدىگىن جانە اۋماقتىق تۇتاستىعىن قۇرمەتتەۋ؛ ي ى ۇ- عا مۇشە مەملەكەتتەر اراسىنداعى داۋلى ماسەلەلەردى كەلىسسوز، ارااعايىندىق نەمەسە اربيتراج ارقىلى بەيبىت جولمەن شەشۋ؛ ۇيىمعا مۇشە مەملەكەتتەر اۋماقتارىنىڭ تۇتاستىعىنا، سونىمەن بىرگە ساياسي تاۋەلسىزدىگىنە دە قارسى كۇش قولدانباۋ نەمەسە قوقان- لوققى كورسەتپەۋ. قازاقستان 1995-جىلى يسلام ىنتىماقتاستىعى ۇيىمىنىڭ تولىق قۇقىلى مۇشەسىنە اينالدى.