الەم بارىسى اتانعان ايبەك نۇعىماروۆ تۋرالى نە بىلەمىز؟

استانا. قازاقپارات - قازاقستاندا قازاق كۇرەسىنەن تۇڭعىش رەت ءتورت دۇركىن الەم چەمپيونى اتانعان جالعىز بالۋان بار. مىنە، بۇگىن سول بالۋانىمىز تاعى ءبىر تاريحي جەڭىسىنە قول جەتكىزىپ، قازاق بالۋاندارى اراسىنان تۇڭعىش «الەم بارىسى» اتاعىن جەڭىپ الدى، دەپ حابارلايدى قازاقپارات ءتىلشىسى.

ول - شىعىس قازاقستان وبلىسىنىڭ تۋماسى، قازاقتىڭ قايسار بالۋان ۇلى ايبەك نۇعىماروۆ.

نەگىزى، ايبەكتى وقىرمان قاۋىمعا قايتا تانىستىرۋدىڭ ءوزى ارتىق بولار. دەسە دە، ەل نامىسىن ەڭ بيىك بەلەستەردەن كورسەتىپ جۇرگەن اسىل ازاماتتارىمىز تۋرالى قانشا جازساق تا كوپتىك ەتپەيتىنى بەلگىلى.

سول ءۇشىن بۇگىن بالۋانىمىز تۋرالى، تاعى ءبىر توقتالىپ، وقىرماندارىمىزعا ونىڭ سپورتتاعى قول جەتكىزگەن تابىستارىن قايتا ءبىر ەستەرىنە سالۋدى ءجون سانادىق.

اۋەلى ايبەكتىڭ سپورتتاعى جەتىستىكتەرى مەن ءومىربايانىنا قىسقاشا توقتالىپ وتەيىك.

ايبەك نۇعىماروۆ 1987-جىلى 3- ماۋسىمدا شىعىس قازاقستان وبلىسى، اباي اۋدانىنا قاراستى قۇندىزدى دەگەن شاعىن اۋىلدا دۇنيەگە كەلگەن. قازاق كۇرەسىنەن الەمدى ءتورت رەت باعىندىرعان (2010, 2013, 2014, 2016) جالعىز بالۋان. ءۇش دۇركىن (2008, 2009, 2014) ازيا چەمپيونى. ونىڭ لاقاپ اتى - شىعىس بارىسى. بويى - 188 س م. سالماعى - 140 ك گ. سپورتتىق اتاعى - قازاق كۇرەسىنەن ق ر ەڭبەك سىڭىرگەن سپورت شەبەرى.

سپورتتىق جەتىستىكتەرى - ءتورت دۇركىن الەم چەمپيونى (2010, 2013, 2014, 2016)، «الەم بارىسى» حالىقارالىق ءتۋرنيرىنىڭ كۇمىس جۇلدەگەرى (2014)، «قازاقستان بارىسى» ءتۋرنيرىنىڭ جەڭىمپازى (2013) جانە ەكى دۇركىن قولا جۇلدەگەرى (2012, 2017)، ەكى دۇركىن الەم كۋبوگىنىڭ يەگەرى (2011, 2017)، ق ر چەمپيوناتىنىڭ بىرنەشە دۇركىن جەڭىمپازى، «ەۋرازيا بارىسى» حالىقارالىق تۋرنيرىنىڭ جەڭىمپازى (2015, 2016) 2011, 2012, 2013, 2014, 2015, 2016, 2017-جىلدارى «قازاقستان بارىسى» تۋرنيرىنە قاتىستى. باپكەرى - سەرىك قورجىكەنوۆ.

شىعىستىڭ شىمىر بالۋانىنىڭ وسىنداي اۋىز تولتىرىپ ايتارلىقتاي جەتىستىكتەرى جەتەرلىك. بۇگىنگى قول جەتكىزگەن تاريحي جەڭىسى كەزدەيسوقتىق ەمەس ەكەنى وسىدان-اق انىق كورىنىپ تۇر.

اۆتور: كۇنسۇلتان وتارباي