قىتايدىڭ ەۋروپاعا جونەلتكەن سالەمدەمەلەرى قازاقستان ارقىلى جەتكىزىلۋى مۇمكىن
«ەڭ الدىمەن الەمدە ەلەكتروندىق كوممەرتسيا نارىعىن وتە جىلدام قارقىنمەن دامىپ وتىر جانە قىتاي ءوسىم نۇكتەسى سانالاتىندىعىن ايتقىم كەلەدى. ەلەكتروندىق كوممەرتسيا نارىعىنىڭ 40 پايىزدان استامى قىتايدا جاسالاتىندىعىن بىلەمىز. سوندىقتان «ءبىر بەلدەۋ، ءبىر جول» قازاقستان ءۇشىن ماڭىزدى جوبا سانالادى. ويتكەنى، قىتايدىڭ ەلەكتروندىق كوممەرتسيا ونىمىنە الەمنىڭ كوپتەگەن ەلدەرى قىزىعۋشىلىق تانىتۋدا. جىل سايىن قىتايدان رەسەيگە قاراي 2 ميلليون، ال ەۋروپاعا قاراي شامامەن ميلليون سالەمدەمە جىبەرىلەدى. كورشى وزبەكستاندا دا وتە جاقسى رەفورمالار جۇرگىزىلىپ جاتىر. مەنىڭشە، تاياۋ ۋاقىتتا بۇل نارىق اشىلادى. بۇل 30 ميلليوندىق ۇلكەن نارىق جانە ەلەكتروندىق كوممەرتسيا نارىعى ءۇشىن تارتىمدى»، - دەدى ول.
ونىڭ ايتۋىنشا، ءالي بابا كومپانياسىنىڭ باعالاۋىنشا، 2020 -جىلعا قاراي قىتايدان ەۋروپاعا جىل سايىن 800 ميلليون سالەمدەمە تاسىمالداناتىن بولادى.
«مىنە ءدال وسى جايت ءبىزدىڭ كومپانيادا قىزىعۋشىلىق تۋدىرادى. ويتكەنى، تەڭىزبەن تاسىمالداۋ ۇزاق ۋاقىتتى السا، ۇشاقپەن جەتكىزۋ قىمبات. سوندا تەمىرجول مەن اۆتوموبيل جولى قالادى. ال بۇل ورايدا ءبىزدىڭ ەلىمىزدىڭ پەرسپەكتيۆاسى وتە جاقسى. سەبەبى ءبىز ارقىلى قىتايدان رەسەي، ەۋروپاعا دەيىن - ەڭ قىسقا جول. ءبىز جىل سايىن حالىقارالىق پوشتا بويىنشا 88 پايىزعا ءوسىپ كەلەمىز. بۇل وتە جاقسى ديناميكا»، - دەدى سارسەنوۆ.
ونىڭ ايتۋىنشا، قازىرگى ۋاقىتتا ەلەكتروندىق كوممەرتسيا نارىعىنىڭ جەتكىزىلۋى 35 تاۋلىكتى قۇرايدى. تاياۋ ۋاقىتتا ونى 10 كۇنگە، ودان كەيىن 3 كۇنگە دەيىن قىسقارتۋعا مۇمكىندىك بار.
اۆتور: مارلان جيەمباي
