بىشكەكتە مۇحتار اۋەزوۆكە ارنالعان عىلىمي كونفەرەنسيا وتەدى

استانا. قازاقپارات - قىرعىزستان ۇلتتىق عىلىم اكادەمياسىندا 15 - قىركۇيەك كۇنى قازاقتىڭ ۇلى جازۋشىسى، قوعام قايراتكەرى، عۇلاما عالىم، اۋدارماشى، دراماتۋرگ مۇحتار اۋەزوۆتىڭ 120 جىلدىعىنا ارنالعان كونفەرەنسيا وتەدى. بۇل تۋرالى Kabar جازادى.

 «اكادەميك م. اۋەزوۆ عىلىم مەن مادەنيەتتە» عىلىمي- تاجىريبەلىك كونفەرەنسياسىنا مادەنيەت پەن ساياسات سالاسىنداعى فولكلورشىلار، ادەبيەتتانۋشىلار، فيلولوگتار، فيلوسوفتار، تاريحشىلار، ەتنوگرافتار، ساراپشىلار قاتىسادى. ءىس- شارا كەزىندە قاتىسۋشىلار ءوز تۋىندالارىن جۇرتشىلىققا ۇسىنادى.

 مۇحتار ومارحان ۇلى اۋەزوۆ - قازاق جازۋشىسى، دراماتۋرگ جانە عالىم. لەنين (1959) جانە ستالين (1946) اتىنداعى ءبىرىنشى دارەجەلى سىيلىقتىڭ لاۋرەاتى. قازاق ك س ر عىلىم اكادەمياسىنىڭ اكادەميگى (1946)، قازاقستان جازۋشىلار وداعىنىڭ ءتوراعاسى. ونىڭ ەكى تومدىق «اباي جولى» رومانى «الەم ادەبيەتىنىڭ كىتاپحاناسىنا» ەندى.