ەلىمىزدىڭ وڭتۇستىگىندە ماقتا تەرىمى باستالدى

استانا. قازاقپارات - ەلىمىزدەگى اق ماقتانى وسىرەتىن جالعىز ءوڭىر بولىپ تابىلاتىن وڭتۇستىك قازاقستان وبلىسىندا ماقتا تەرىمى باستالدى، دەپ حابارلايدى اكىمنىڭ باسپا ءسوز قىزمەتى.

قازىرگى تاڭدا اق التىندى جيناۋدى ماقتارال اۋدانىنداعى اتاماكەن، ش. دىلدابەكوۆ، ماقتالى، قىزىلقۇم، جامبىل جانە قاراقوي اۋىلدارىنداعى ۇساق شارۋا قوجالىقتارى باستاپ كەتتى.

بيىل وبلىستا 134,6 مىڭ گەكتار جەرگە ماقتا ءشيتى سەبىلگەن. بۇل وتكەن جىلمەن سالىستىرعاندا 25 مىڭ گەكتارعا ارتىق. 2016 -جىلى شارۋالار ءار گەكتارىنا ورتاشا ەسەپپەن 26,2 سەنتنەردەن ءونىم الىپ، بارلىعى 286,4 مىڭ توننا اق ۇلپا جيناعان. ەگىس كولەمىنىڭ ارتۋىنا بايلانىستى وڭىردە 300 مىڭ توننادان استام ماقتا جينالادى دەپ جوسپارلانۋدا.

ەلىمىزدەگى اق التىننىڭ وتانى سانالاتىن ماقتارال اۋدانىندا وتكەن جىلى 83 مىڭ گەكتارعا ماقتا ءشيتى سەبىلسە، بيىل ماقتا القابى 95 مىڭ گەكتارعا جەتكەن. اۋدان شارۋالارى وتكەن جىلى 218 مىڭ توننا ءونىم جيناسا، بيىل دا مول ءونىم الۋدى كوزدەپ وتىر.

 وبلىس بويىنشا ماقتا داقىلى 9 اۋداندا ەگىلەدى. العاش بولىپ جيىن- تەرىم جۇمىستارى ماقتارال، شارادارا، سارىعاش اۋداندارىندا باساتالادى. ەڭ سوڭعى بولىپ اق التىندى تۇركىستاندىق شارۋالار جينايدى.

 ماقتا - ەكسپورتتىق الەۋەتى جوعارى داقىلداردىڭ ءبىرى. ەلىمىز اق التىندى نەگىزىنەن رەسەي، قىتاي جانە ەۆروپا ەلدەرىنە ەكسپورتتايدى. ماسەلەن وتكەن جىلى اتالعان مەملەكەتتەرگە ەلىمىزدەن 58 مىڭ توننا ماقتا تالشىعى ەكسپورتتالعان.