كەدەيشىلىك سانانى جاڭعىرتۋعا كەدەرگى جاسايدى - ەرلان سايىروۆ

استانا. قازاقپارات - ادامنىڭ ءوزى كەدەيشىلىكتەن شىعۋعا تىرىسپاسا، سانانى جاڭعىرتۋ شارالارى ىسكە اسپاي قالادى.

ال مەملەكەتتىڭ شىعىندارى ارتادى، دەپ حابارلايدى قازاقپارات ءتىلشىسى.

«پرينستون ۋنيۆەرسيتەتىنىڭ پسيحولوگى ەلدار شاففەر ءوزىنىڭ «دەفيتسيت» اتتى كىتابىندا كەدەي ادامداردىڭ ءوز-وزىنە كومەكتەسە الماۋىنىڭ سەبەبىن ءدال كورسەتتى.

نەگىزى ماسەلە مىنادا، تۇرمىسى تومەن ادامدار «تونەلدىك» ويلاۋدىڭ قۇربانىنا اينالادى. ءدال وسىنداي ويلاۋدىڭ سالدارىنان ومىردە باتىل شەشىمدەر قابىلدانبايدى. كەدەي ادام ەرتەڭگى نانىن تاۋىپ، قىسقا مەرزىمدى جوسپارىن جاساي الادى. ءسويتىپ، «كۇنى وتكەننىڭ كۇنى ارتىق» دەپ جۇرەدى. الايدا ۇزاق مەرزىمدى جوسپارلاردى قۇرا المايدى. قوسىمشا ءبىلىم الۋدى، كاسىبي بىلىكتىلىگىن اۋىستىرۋدى دا ويلامايدى. سودان جاڭا جۇمىستى دا ىزدەمەيدى. وسىلايشا، جان ساقتاۋدىڭ قامىمەن جۇرەدى. ارتىنان نەسيە الادى دا، ءوز جاعدايىن قيىنداتىپ جىبەرەدى»، - دەدى ساياساتتانۋشى سايىروۆ بۇگىن سانانى جاڭعىرۋ تاقىرىبىنا ارنالعان كاسىپوداقتار فەدەراتسياسىنىڭ رەسپۋبليكالىق فورۋمىندا.

ونىڭ ايتۋىنشا، بۇگىندە كەز كەلگەن مەملەكەتتە كەدەيشىلىكپەن كۇرەس شارالارىنا قىرۋار قارجى كەتەدى. ماسەلەن، ا ق ش- تىڭ وزىندە 2013 -جىلعا دەيىن بالالار اراسىنداعى كەدەيشىلىكپەن كۇرەس شارالارىنا 500 ميلليارد دوللاردان استام اقشا جۇمسادى. الايدا جۇيەلى جۇمىستىڭ ارقاسىندا اتالعان شىعىنداردى ءۇش ەسەگە قىسقارتۋعا بولاتىن ەدى.