قوستاناي وبلىسىندا الىپ قويلار وسىرىلمەك

قوستاناي. قازاقپارات - قوستاناي وبلىسىندا «باستاۋ بيزنەس» جوباسى قارقىندى جۇزەگە اسۋدا، دەپ حابارلايدى قازاقپارات.

 وبلىستا «باستاۋ بيزنەس» جوباسى بويىنشا ءوتىنىم بەرگەن 779 ادامنىڭ 180- ءى قازىردىڭ وزىندە كاسىبىن قولعا الدى. بيزنەس- ستراتەگيالار ءىرى قارا ءوسىرۋدى، قوي مەن ەشكى باپتاۋدى، ءسۇت ءوندىرىسىن قۇرۋدى جانە بورداقىلاۋ الاڭدارىن سالۋدى كوزدەيدى. ال قوستاناي وبلىسى اۋىل شارۋاشىلىعى باسقارماسى بۇلارعا ەرەكشە نازار اۋدارىپ وتىر. «اتامەكەن» كاسىپكەرلەر پالاتاسىنىڭ ساراپشىسى روبەرت يۋسۋپوۆتىڭ ايتۋىنشا، قۇرىلىس ماتەريالدارىنىڭ ءوندىرىسى، جۇك تاسىمالى سياقتى باسقا دا اۋقىمدى جوبالار بار.

 كوميسسيا مۇشەلەرىنىڭ نازارى جاس كاسىپكەر قايرات اۋباكىروۆتىڭ جوباسىنا بىردەن تۇسكەن.

كاسىپكەر اۋليەكول اۋدانىندا اسىل تۇقىمدى دورپەر قويلارىن يننوۆاتسيالىق جولمەن كوبەيتىپ، تاراتۋدى قولعا الماقشى. ول ءۇشىن «اتامەكەن» ميكروقارجى ۇيىمىنان 2,5 ميلليون تەڭگە نەسيە الۋعا نيەتتى. «باستاۋ بيزنەس» جوباسىنىڭ قاتىسۋشىسى قازىردىڭ وزىندە جايىلىمدىق القاپتاردى تاۋىپ قويعان.

«اۆستراليانىڭ دورپەر تۇقىمدى قويلارى ەتتى كەلەدى. ول ەكى- ءۇش كۇن سۋ ىشپەي جۇرە بەرەدى. تەرىسىنە قۇرت جولامايدى، ءجۇنى ءوزى ءتۇسىپ قالادى. قويدىڭ سالماعى - 140 كەلى. اپتاپ ىستىقتا دا، وتىز گرادۋستىق ايازدا دا شىدامدى تۇلىك ءشوپتى كوپ جەمەيدى. شارۋاعا كەرەگى وسى. ەگەر مەنىڭ جوبام قابىلدانسا، دورپەر تۇقىمدى 20-30 باس قويدى ساتىپ الامىن»، - دەدى قايرات اۋباكىروۆ.

باتىر جولاي ۇلى