الماتىدا اراب سايگۇلىكتەرىنىڭ العاشقى چەمپيوناتى وتەدى - فوتو
قازاقستاندا ءوسىرىلىپ جاتقان 20-عا جۋىق اسىل تۇقىمدى جانۋار دەنە تۇرقى، قيمىل- قوزعالىسى ستاندارتتارعا سايكەستىك بويىنشا باق سىناسادى. ەكى كۇنگە سوزىلاتىن فەستيۆال الما- اراسان شاتقالىنداعى ات سپورت كلۋبىندا وتەدى. اتالعان كلۋبتا جىلقىلارعا بارىنشا جاعداي جاسالعان.
« KazEqui-2017- بۇل ەرەكشە شوۋ. ورتالىق ازياداعى بىرەگەي كورمە. مۇندا اسىل تۇقىمدى جىلقى باعاتىندار عانا ەمەس، ساراپشىلار، جىلقى يندۋسترياسىنىڭ وندىرۋشىلەرى، وسى سپورت ءتۇرىنىڭ وكىلدەرى باس قوسادى»، - دەدى كلۋب جەتەكشىسى مارينا بۋكانوۆا.
KazEqui-2017 فەستيۆالىندە ىسكەرلىك كەزدەسۋلەردەن بولەك وتباسىلىق دەمالىس تۇرلەرى قاراستىرىلعان. جاس يپپولوگ ۇيىرمەسى، پونيمەن سەرۋەن، وتباسىلىق كۆەستكە قاتىسۋعا مۇمكىندىك تۋادى. كەشكىسىن جىلقىلاردىڭ قاتىسۋىمەن سپەكتاكلدەر، ءتۇرلى تۇقىمعا جاتاتىن جىلقىلاردىڭ شەرۋى ۇيىمداستىرىلادى. كەلۋشىلەر الەمدەگى ەڭ ءىرى شاير تۇقىمداس جىلقىلاردان باستاپ ەڭ ماستەك جىلقىلارعا دەيىن كورە الادى. سونىمەن قاتار گيننەستىڭ رەكوردتار كىتابىنا ەنگەن الەمدەگى ەڭ كىشكەنتاي جىلقى امەريكاندىق گۋلليۆەر كەلەدى.
«سوڭعى ۋاقىتتا قازاقستاندا جىلقى سپورتى ەرەكشە قارقىنمەن كوتەرىلىپ كەلەدى. حالىقتىڭ جاعدايى جاقسارعان سايىن تازا تۇقىمدى جىلقى باعۋ دا پايدالى ينۆەستيتسيا قۇرالىنا اينالۋدا قازاقستاندا جىلقى يەسىنىڭ مارتەبەسى جوعارى. سوندىقتان قازاقتاردىڭ اراسىندا جىلقىعا قىزىعۋشىلىق بۇرىنعىداي ارتىپ كەلەدى»، - دەدى كاسىبي جىلقى ءوسىرۋشى يگور بوچكاريەۆ. ايتا كەتۋ كەرەك، جىلقى فەستيۆالىنە كىرۋ بيلەتىنىڭ قۇنى 1 كۇنگە 5000 تەڭگە، 12 جاسقا دەيىنگى بالالار تەگىن كىرە الادى.
اۆتور: گۇلميرا عوسمانالي
