پاريج كەلىسىمىن ساقتاۋعا قازاقستان قانشا قاراجات جۇمسايدى
«ءبىزدىڭ ەسەبىمىزگە سايكەس، پاريج كەلىسىمىندە كورسەتىلگەن ماقساتتارعا قول جەتكىزۋ ءۇشىن قازاقستانعا 155 ميلليارد دوللار قاجەت. بۇل «جاسىل ەكونوميكاعا» ءوتۋ ەسەبىنەن ءسال كوبىرەك، بۇل جاڭارتىلعان مالىمەتتەر»، - دەدى «قازاقستاننىڭ جاسىل قارجى جۇيەسى» جوباسى بويىنشا جۇمىس توبىنىڭ جەتەكشىسى كاتۋللۋس حەلمەر استانادا وتكەن كونفەرەنسيادا.
سونىمەن بىرگە، ول ەۋروپالىق قايتا قۇرۋ جانە دامۋ بانكىنىڭ زەرتتەۋلەرىنە سايكەس، قازاقستانعا سالىنعان ينۆەستيتسيالاردىڭ تابىستى بولاتىنىن اتاپ ءوتتى.
ال ينۆەستورلاردىڭ 50 پايىزى قازاقستان ەكونوميكاسىنىڭ «تابەتى» ورتاشادان باستاپ جوعارىعا دەيىنگى ارالىقتا دەپ ەسەپتەيدى.
ك. حەلمەر قازاقستاننىڭ تۇراقتى دامۋى ءۇشىن «جاسىل» ەكونوميكاعا ءوتۋى قاجەتتىگىن باسا ايتتى.
«مۇناي ارزاندادى، ەنەرگەتيكا نارىعى دا قىسقارىپ كەلەدى، كۇردەلى نارىق جاعدايى ورىن الدى. كومىرتەك نارىعى - بۇل ماقساتتارعا قول جەتكىزىپ، «جاسىل» ينۆەستيتسيالاردىڭ ەركىن لەگىن جانداندىرۋدىڭ باستى تەتىگى»، - دەپ ءوز ءسوزىن تولىقتىردى ول.
ەسكە سالا كەتسەك، 2016-جىلدىڭ قاراشا ايىندا قازاقستاندا پاريج كەلىسىمى ءوز كۇشىنە ەندى. كەلىسىمگە سايكەس، قازاقستان 2030-جىلعا دەيىن پارنيكتىك گاز قالدىقتارىن %15 عا دەيىن قىسقارتۋى ءتيىس.
اۆتور: ايجان سەرىكجان قىزى
