تالدىقورعاندا رۋحاني كەرۋەن جولعا شىقتى

تالدىقورعان. قازاقپارات - تالدىقورعاندا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى اياسىندا رۋحاني كەرۋەن جولعا شىقتى، دەپ حابارلايدى قازاقپارات ءتىلشىسى.

زيالى قاۋىم وكىلدەرىنەن قۇرالعان توپ الماتى وبلىسىن ارالاپ، 16 اۋدان مەن 3 قالاداعى اعايىن تىنىسىمەن تانىسادى. سونداي-اق وزدەرى دە پرەزيدەنت ماقالاسىنداعى باعىتتاردى ءتۇسىندىرىپ، ءتۇرلى مادەني جانە رۋحاني ماڭىزى بار كەزدەسۋلەر ۇيىمداستىرادى. رۋحاني كەرۋەن قۇرامىنا ءار ءتۇرلى سالادان 50 گە جۋىق مامان كىرىپ وتىر. ساپار بارىسىندا جەتىسۋلىقتار نازارىنا سۋرەت پەن كىتاپ كورمەلەرى، كونسەرتتىك باعدارلامالار مەن «دەرتكە داۋا-حاق جولى» اتتى قويىلىمدار ۇسىنىلماق.

كەرۋەنگە ءسات ساپار تىلەگەن وبلىس اكىمىنىڭ ورىنباسارى جاقسىلىق وماردىڭ ايتۋىنشا، بۇل جالپى رۋحاني جاڭعىرۋ باعدارلاماسى اياسىنداعى 100 دەن استام جوبانىڭ ءبىرى. شارانىڭ ماقساتى قازاقستان حالقىنىڭ ءداستۇرلى رۋحاني مادەنيەتىن ىلگەرىلەتۋ، مەملەكەتىمىزدىڭ رۋحاني تىرەگى، ءدىنىمىزدىڭ جالپىعا ورتاق ادامگەرشىلىك قاعيدالارىن ناسيحاتتاۋ دەيدى، - وبلىس اكىمىنىڭ ورىنباسارى.