ايگىلى مۋزىكانت زۋبين مەتا تۇركىستاندا بولدى
تانىمال مۋزىكانت، ديريجەر زۋبين مەتا ەكسپو-2017 كورمەسىنە قاتىسىپ، لاسكالا تەاترى قازاقستاندىق كورەرمەندەردىڭ نازارىنا ۇلى كومپوزيتورلاردىڭ ماڭگىلىك تۋىندىلارى - دجۋزەپپە ۆەرديدىڭ «فالستاف» وپەراسىن جانە ل. بەتحوۆەننىڭ سيمفونياسىن ۇسىنۋى جوسپارلانعان. وسى ماقساتتا ت م د ەلدەرى اراسىندا تۇڭعىش رەت استانا قالاسىنا تابان تىرەگەن زۋبين مەتا تۇركىستان قالاسىندا ساۋلەت ونەرىنىڭ وزىق ۇلگىسى، رۋحاني مۇرا ق. ا. ياساۋي كەسەنەسىن تاماشالادى.
بەلگىلى ونەر يەسىن زور قوشەمەتپەن قارسى العان تۇركىستاندىقتار مارتەبەلى مەيماندارعا ۇلتتىق داستۇرمەن ورنەكتەلگەن ءجون-جورالعىمەن ەرەكشە قۇرمەت كورسەتتى. تۇركىستان قالاسىنىڭ اكىمى ءا. وسەربايەۆ ىستىق ىقىلاسىن جەتكىزىپ، زۋبين مەتاعا شاپان جاۋىپ، قازاقتىڭ قىل قوبىزىن تارتۋ ەتتى. سونىمەن بىرگە، قالالىق «اقساقالدار القاسىنىڭ» ءتوراعاسى ج. ازىرەتبەرگەن ۇلى مۋزىكا الەمىنىڭ كورنەكتى تۇلعاسىنا بارشا تۇركىستان حالقىنىڭ سالەمىن جولداپ، مول شىعارماشىلىق تابىس تىلەدى.
وسىلايشا ساپار ق. ا. ياساۋي كەسەنەسىمەن تانىسۋعا ۇلاستى. سوناۋ زامانداردان سىر شەرتەتىن كەسەنەنىڭ بولمەلەرىن ارالاپ، ۇلتتىڭ ۇلىلىعىنان اقپار العان زۋبين مەتا جۋرناليستەرگە بەرگەن سۇحباتىندا قازاق حالقىنىڭ دۇنيەتانىمىنا، رۋحاني مۇرالارعا دەگەن قۇرمەتى مەن قوناقجايلىعىنا ەرەكشە تاڭدانىسىن جەتكىزدى.
سونداي-اق، ول «ەلباسىلارىڭىز ن. ءا. نازاربايەۆتىڭ ەل باسقارۋداعى كەمەڭگەرلىگى ماعان ايرىقشا بايقالدى. از ۋاقىت ىشىندە ساۋلەتتىك كەلبەتى الەمىنىڭ وزگە قالالارىنا ۇقسامايتىن استاناداي قالا تۇرعىزىپ، جاس مەملەكەتتى وركەنيەتى بيىك، الەۋەتى جوعارى ەلگە اينالدىرعانى ايقىن سەزىلىپ تۇر. قازاقستانعا ونىڭ ىشىندە استانا قالاسىنا جاساعان ساپارىم ماعان ەرەكشە اسەر بەردى. ال، تۇركىستان قالاسى جانە ونىڭ قوناق كەلسە قۇشاعىن كەڭ جاياتىن دارحان پەيىلدى تۇرعىندارىن مەن ۇمىتپايمىن. بۇل مەملەكەت جانە ونىڭ حالقى جايلى كەڭ ناسيحات بولۋى كەرەك دەپ ەسەپتەيمىن جانە مەن جۇرگەن جەرىمدە قازاق ەلى تۋرالى ايتا جۇرەتىن بولامىن»، - دەپ قازاقستانعا جاساعان ساپارىن جوعارى باعالادى.
ايگىلى مۋزىكانتپەن بىرگە كەلگەن جۇبايى نەنسي مەتا: «مەن قازاقستانعا كەلگەنگە دەيىن بۇل ەل تۋرالى مۇلدە باسقاشا كوزقاراستا ەدىم. مىنە، وسى ساپاردا نۇرسۇلتان نازاربايەۆ باسقاراتىن قازاقستان مەملەكەتىنىڭ وركەندەپ ءوسىپ كەلە جاتقانىن جانە ونىڭ حالقىنىڭ بولاشاققا دەگەن سەنىمىنىڭ نىق ەكەندىگىنە كوز جەتكىزدىم»، - دەپ پىكىر ءبىلدىردى.
ساپاردى قورىتىندىلاعان ق ر مادەنيەت جانە سپورت ءمينيسترى ارىستانبەك مۇحامەدي ۇلى ءوز سوزىندە: «قازاقستانعا ساپار شەگىپ وتىرعان الەمگە اتى ءماشھۇر زۋبين مەتانىڭ كەلۋى ۇلكەن مارتەبە جانە دە قۇرمەتتى قوناقتىڭ وسىندا كەلىپ قانا قويماي لاسكالا تەاترى قازاقستاندىق كورەرمەندەردىڭ نازارىنا ۇلى كومپوزيتورلاردىڭ ماڭگىلىك تۋىندىلارىن ۇسىنۋى ەلىمىزدىڭ وركەنيەتتى ەلدەر قاتارىندا ۇمتىلۋدا ايتارلىقتاي بەلەسكە جەتكەندىگىن بايقاتادى. ەلباسىمىزدىڭ ۇلتتىق ونەرگە، مادەنيەتىمىزگە دەگەن قامقورلىعى قوناقتارىمىزدى دا بەي- جاي قالدىرىپ وتىرعان جوق. سەبەبى، ونەردىڭ بيىك شىڭىن باعىندىرعان زۋبين مەتا مىرزا ەلىمىز جايىنداعى كوز قاراسىندا مادەنيەتىمىز بەن از ۋاقىت ىشىندە وعان جاسالعان قولداۋلاردىڭ مول بولعاندىعىن پايىمداپ، ۇلتىمىزدىڭ ونەرگە دەگەن قۇرمەتىنىڭ جوعارى ەكەندىگىن جەتكىزدى. ال، تۇركىستان قالاسىنا جاساعان ساپارىندا ول كىسى وسىنداعى قۇندى مۇرالارىمىزعا ەرەكشە قىزىعۋشىلىق تانىتىپ، حالقىمىزدىڭ دۇنيەتانىمىنىڭ كەڭ ەكەندىگىنە تاعى ءبىر كوز جەتكىزدى»، - دەپ اتاپ ءوتتى.