اتىراۋداعى مۋزەي ەجەلگى كۇمىس زەرگەرلىك بۇيىمداردىڭ قۇپياسىن اشتى
ول جەردە ۇلتتىق مادەنيەتىمىزدىڭ قازىناسىنا ەنگەن وتكەن عاسىرداعى شەبەرلەردىڭ ۇزدىك جۇمىستارى ۇسىنىلعان، دەپ حابارلايدى «قازاقپارات» ح ا ا ءتىلشىسى.
«بۇل كورمەدە ءارتۇرلى جۇزىكتەر، بىلەزىكتەر مەن بويتۇمارلار، بەلبەۋلەر مەن قورىمىزداعى جۇزىكتەردى ۇسىندىق. بۇل جاي عانا كۇمىس بۇيىمدار ەمەس، وتكەن عاسىرداعى قازاق زەرگەرلىك مادەنيەتىنىڭ تۋىندىسى سانالادى. قازاق حالقى ءۇشىن كۇمىستەن جاسالعان زەرگەرلىك بۇيىمدار جاي اشەكەي ەمەس. ءار زاتتىڭ ءوز ماعىناسى بولعان، ونىمەن بىرگە قانداي دا ءبىر تاريح، وقيعا، ادامداردىڭ سەنەتىن ىرىمى بايلانىستى بولعان»، - دەدى اتىراۋ تاريحي- ولكەتانۋ مۋزەيىنىڭ ديرەكتورى راشيدا حاريپوۆا.
«مىسالى، قۇستۇمسىق جۇزىك باقىتتىڭ، جاڭا ءومىردىڭ بەلگىسى سانالعان. سونداي- اق، ول حات ءرولىن ويناعان. بۇل جۇزىكتى اناسى ۇزاتىلىپ بارا جاتقان قىزىنا تاققان. تۇرمىسقا شىققان قىزدى ونىڭ جاسى ۇلكەن ەركەك كىندىك تۋىستارى - ۇلكەن اعاسى نەمەسە اعايى ءبىر جىلدان كەيىن ىزدەپ باراتىن بولعان»، - دەپ ءتۇسىندىردى مۋزەيدىڭ ەتنوگرافيالىق ءبولىمىنىڭ مەڭگەرۋشىسى ءلاززات ساليحوۆا.
«ولار قىزدىڭ ۇيىنەن سىي- سىياپاتپەن قايتىپ كەلە جاتقاندا، اناسى تاعاتسىزدانا اق ورامالدى كۇتىپ وتىرعان. ەگەر ورامالدىڭ ىشىنە تۇيىلگەن قۇسمۇرىن جۇزىك قايتىپ كەلسە، قىزدىڭ كۇيەۋىنىڭ ۇيىنە ءسىڭىسىپ كەتكەنىن بىلدىرگەن. ەگەر قىز جۇزىكتى قايتىپ بەرمەسە، دەمەك ونىڭ جاعدايىنىڭ جاقسى بولماعانى»، - دەدى ەكسكۋرسيا جەتەكشىسى عاليا نازاربەكوۆا.
ەكى ساۋساققا ارنالعان قوسارلانعان جۇزىك ەكى وتباسىنىڭ بىرىگۋىن بىلدىرگەن. ول «قۇداعي جۇزىك» دەپ اتالعان. قازاق شەبەرلەرىنىڭ زەرگەرلىك بۇيىمدارى الەمنىڭ كوپتەگەن مۋزەيلەرىندە ساقتاۋلى تۇر. ەرميتاجدا دا كوپتەپ كەزدەسەدى. ول نەگىزىنەن - قازاق حاندارىنىڭ ورىس پاتشالارىنا بەرگەن سىيلارى. كورمە زالىندا كۇمىس بۇيىمدار جاسالعان قۇرال- جابدىقتار ەرەكشە ورىن الىپ تۇر. ونى مۋزەيگە رەسەي فەدەراتسياسى استراحان وبلىسىنىڭ اۋماعىنداعى بوكەي ورداسىندا تۇرعان زەرگەرلەردىڭ ءبىرىنىڭ ۇرپاقتارى بەرگەن.
