ۇستانىڭ ۇيىنە اراق ءىشىپ كەلگەن ادامنىڭ كوزىنە جىلان كورىنەدى - فوتو
تەمىردەن ءتۇرلى تۋىندى مەن نەبىر زەرگەرلىك بۇيىم جاسالاتىن كيەلى ۇستاحانا جالەن ەرىمبەت ۇلىنىكى ەكەن. ول كىسى ەل اۋزىندا «جالەن اتا» دەپ اتالىپ كەتكەن. قۇپيا سىردى بۇككەن ۇستاحانانىڭ يەسى 1902-1982 -جىلدارى ءومىر سۇرگەن.
ۇستانىڭ نەمەرەسى ءلاززات جالەنوۆانىڭ ايتۋىنشا، جالەن اتاسىنىڭ ۇستاحاناسى پەرى اۋناعان جەرگە سالىنعان كورىنەدى.
«ۇستالاردىڭ جۇمىس ورىنىن حالىق «قارا دۇكەن» دەپ اتايدى عوي، مۇنداي جەردى قاسيەتتى دەپ بىلەدى. اتام ءارۋاق قونعان كىسى. جىن- پەرىلەردى جۇمسايتىن بولعان. قالىڭ قامىستىڭ اراسىنا ءبىر قولى جوق بولسا دا ءوزى كىرىپ كەتىپ، پىشەن ءشوبىن ورادى ەكەن. سوندا وعان پەرىلەر كومەكتەسەتىن كورىنەدى. راسىندا كورىك باساتىن ۇستالىق ونەر كەز كەلگەن جانعا بۇيىرا بەرمەيتىن كيەلى ءىس قوي. اتامىزدىڭ ءبىر قولى بولماعان، سوعان قاراماستان شەبەر ۇستا بولعان. تەمىردەن ءتۇرلى بۇيىمداردى جاساپ شىعاراتىن. زەرگەرلىك ونىمدەرى دە وتە ادەمى. ءوز قولىمەن جاساعان دۇنيەلەرى ۇستاحانادا ءالى كۇنگە دەيىن ساقتاۋلى تۇر» ، - دەيدى ءلاززات جالەنوۆا.
جالەن اتانىڭ كىندىگىنەن جەتى بالا وربىگەن. سونىڭ ىشىندە ساحيت ەسىمدى ۇلى اكە جولىن جالعاستىرعان. قازىرگى تاڭدا «قارا دۇكەندى» ساحيتتىڭ كەنجەسى امانات ۇستاپ وتىر.
اماناتتىڭ ايتۋىنشا، تەمىردەن ءتۇيىن تۇيگەن جالەن اتا تەگىن ادام بولماعان. ۇستانىڭ كوزىنە جانارى قىپ- قىزىل وت بولىپ جۇرەتىن ءبىر ءۇيىر جىلقى مەن جىلان كورىنەدى ەكەن. ال جىلانىن ساحيت اكەسى كەشەگى كۇنگە دەيىن كورگەن- دى.
«ءبىزدىڭ ۇيگە ىشىمدىك ىشكەن ادام كەلسە، الدىنان ۇزىن قارا جىلان شىعىپ، ىسىلداپ تۇرىپ الادى. كەزىندە سول كەرەمەتتى كورگەن ادام ءاپ- ساتتە تالىپ تا قالاتىن. ۇستاحانا ءىسىن بىزگە تاستاۋعا بولمايدى، ءبىزدىڭ ماقساتىمىز - كيەلى ورىندى تازا ۇستاپ، كورىك باسىپ، بالعا ۇرىپ، ءتوس سوعۋ، سول ارقىلى ەلگە قىزمەت قىلۋ. بۇل «قارا دۇكەننىڭ» ىشىندە ادام بولماسا دا كەي مەزگىلدەرى دۇرسىلدەگەن، تارس- تۇرس ەتكەن داۋىس شىعىپ جاتادى» ، - دەيدى امانات.
ەل ىشىندە «قاسيەت قونعان قارا دۇكەن» اتالىپ كەتكەن ۇستاحاناعا ارا- تۇرا ەمىنە شيپا ىزدەگەن ناۋقاستار كەلەدى. سوندا تۇنەپ، تازالىق تۇنعان جەرگە اۋناعانعا ۇستاحانانىڭ شاپاعاتى تيۋدە.
Baq.kz