قازاقستاننىڭ جاستار ۇيىمى ەكولوگيا سالاسىنداعى حالىقارالىق ماراپاتقا يە بولدى
ماراپاتتى اۆستريا ەلشىلىگىنىڭ ساۋدا كەڭەسشىسى ميحاەل ميۋللەر تابىس ەتتى. Energy Globe Award سىيلىعىنىڭ ماقساتى - ەكولوگيالىق وزگەرىستەر مەن تابيعي رەسۋرستاردى ءتيىمدى پايدالانۋ قاجەتتىگى تۋرالى حالىقتى حاباردار ەتۋ.
بايقاۋعا جىل سايىن 178 گە جۋىق مەملەكەت وكىلدەرى قاتىسادى. بۇل سىيلىق ەكولوگيا، ەنەرگيانىڭ تيىمدىلىگى جانە جاڭارتىلاتىن ەنەرگيا كوزدەرى سالاسىنداعى الەمنىڭ ۇزدىك جوبالارىن انىقتايدى جانە ماراپاتتى ءار جىلدارى كوفي اننان، ميحايل گورباچيەۆ، مارتين شين، پەتەر فالك سىندى تانىمال تۇلعالار العان.
پاۆلودارلىق «رودنوە پرييرتىشە» جوباسى حالىقارالىق ۇيىمنىڭ بارلىق ماقساتتارىنا سايكەس كەلەدى. بۇل جوبا جاستاردى قورشاعان ورتانى تازا ۇستاۋ مەن تابيعي بايلىققا ۇقىپتى قاراۋعا شاقىرادى. «جوبانىڭ نەگىزگى ماقساتى - قوعام نازارىن ەرتىس وزەنى باسسەينىنىڭ تابيعاتىن زەرتتەۋ مەن قورعاۋعا اۋدارۋ. ءبىزدىڭ باستاما اياسىندا پاۆلوداردىڭ 200 دەن استام مەكتەپ وقۋشىلارى، ستۋدەنتتەر جانە ۇ ە ۇ وكىلدەرى ەرتىس وزەنى القابىنىڭ جاعالاۋ ايماعىنداعى قالا حالقى مەن وزەننىڭ ەكوجۇيەسىنە ءقاۋىپ توندىرگەن ەسكى ورماننىڭ ورنىن تازالاۋعا اتسالىستى.
ودان بولەك، جوبانىڭ باستى كەزەڭى وزەن جاعاسىنا تۇراقتى باقىلاۋ جۇرگىزۋ بولىپ تابىلادى. بۇل ەكوجۇيەدەگى وزگەرىستەردى باعالاۋ نەگىزىن قالىپتاستىرادى جانە ءتيىمدى ءارى ارزان ەكولوگيالىق شەشىمدەردى جاساۋعا مۇمكىندىك بەرەدى ، - دەپ پىكىر ءبىلدىردى «جاس گۆارديا» قق ديرەكتورى يۋري دوۆگالەنكو.
ايتا كەتەيىك، 2012-جىلدان بەرى ەرتىس وزەنىنىڭ جاعالاۋىن تازالاۋ ناۋقانى جىل سايىن وتكىزىلىپ كەلەدى.
