استاناداعى وڭتۇستىك قازاقستان كۇندەرى اياسىندا «شانشار»، «الداراسپان» ونەر كورسەتەدى
ءوڭىردىڭ مادەنيەتى مەن ونەرىن كورسەتۋ اياسىندا 42 شارادان تۇراتىن ءىس-شارالار كەستەسى قۇرىلعان، دەپ حابارلايدى «قازاقپارات» ح ا ا ءتىلشىسى.
ايتۋلى شارا وڭتۇستىك قازاقستان وبلىسىنىڭ مادەنيەتى مەن ونەرىن، وندىرىستىك- ەكونوميكالىق مۇمكىندىكتەرى مەن تاۋارلارىن، تاريحي- مادەني ورىندارىن، كونە قالاشىقتارىن كورسەتۋ ماقساتىندا ۇيىمداستىرىلىپ وتىر. سونداي-اق شارا بارىسىندا وڭتۇستىكتىڭ برەندى رەتىندە تانىلاتىن كيەلى جەرلەرى مەن تۋريستىك الەۋەتتىن ەلباسىمىز نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى باسىمدىلىقتارمەن ۇشتاستىرا وتىرىپ، كورسەتۋ كوزدەلۋدە. جوسپارلانعان 42 شارا بارىسىندا «قۇتتى ولكە قولونەرى» قولونەر شەبەرلەرىنىڭ كورمەسى، «تۇركى ەلىنىڭ ءتۇپ تامىرى - وڭتۇستىكتەن مەرەيلى استاناعا سالەم!» ونەر كەرۋەنى، «سالەم استانا، سالەم ەكسپو-2017!» وڭتۇستىك قازاقستان وبلىسى ونەر شەبەرلەرىنىڭ كورمەسى، قازاقستان رەسپۋبليكاسىنىڭ كونستيتۋتسياسى كۇنىنە ارنالعان «ايبارى مىقتى- اتا زاڭ» سالتاناتتى كونسەرتىك باعدارلاماسى، «وڭتۇستىك جاستارى شاقىرادى» اتتى مەرەكەلىك كونتسەرتى ۇيىمداستىرىلادى.
سونىمەن قاتار، « ۇلىسىمنىڭ ۇيىتقىسى- وڭتۇستىك» اقىن، جازۋشىلاردىڭ شىعارماشىلىق كەزدەسۋ كەشى جانە «تۇلعا، تاۋەلسىزدىك، تاريح»، «جاھان تانىعان جەتى تۇلعا» كىتابىنىڭ تۇساۋكەسەرى وتەدى. اۋىز ادەبيەتىندە ەجەلدەن قالىپتاسقان پوەزيالىق جانرى ايتىس ونەرىن دارىپتەۋگە ارنالعان «ءبىز - ەكسپونى جىرلايمىز» حالىقارالىق اقىندار ايتىسى باستاۋ الادى.
تاريحي- مادەني ورىندار، كونە قالاشىقتارىن، وڭتۇستىكتىڭ برەندى رەتىندە تانىلاتىن كيەلى جەرلەرى مەن تۋريستىك الەۋەتى تۋرالى وڭتۇستىك وڭىرىندە 800 گە جۋىق كيەلى جەرلەر ورنالاسقاندىعىن، اۋليەلى، تاريحي جەرلەرگە باي ەكەندىگىن تانىستىرۋ ماقساتىندا "تولاعاي"، "قازاقستان بارىسى"، "قازاقستان برەندى"، "وتىرار داستانى"، "مۇڭلىق - زارلىق"، "ناۋرىزەك" انيماتسيالىق كوركەمفيلمدەرى مەن ۆيدەوروليكتەرى كورسەتىلەدى.
شاراعا ءوڭىردىڭ تاريحي قۇندىلىعى مەن ەرەكشە مادەني كەلبەتىن دارىپتەيتىن ەڭ كورنەكتى جادىگەرلەر ورنالاستىرىلادى.
سونداي-اق قازاق كۇرەسىنىڭ دارابوزى اتانعان قاجىمۇقان بابامىزدىڭ ومىرىنە، پالۋاندىعى مەن پاتريوتتىعىنا كۋا بولار فوتوسۋرەتتەر مەن تاريحي قىسقا مەتراجدى دەرەكتى فيلمدەر الەمدىك سايىستاردان جەڭىپ العان وردەن- مەدالدارى جانە 74 جاسىندا ۇلى اقىنىمىز اباي قۇنانباي ۇلىنىڭ 100 جىلدىق مەرەيتويىنا كيىپ بارعان كيىمدەرى، جاتتىعۋ كەزىندە پايدالانعان كىر تاستارى ەلوردا جۇرتشىلىعىنىڭ نازارىنا ۇسىنىلماق.
سونىمەن قاتار، ءجۇز مىڭنان اسا قۇندى جادىگەرى بار وڭتۇستىك مۋزەيلەرى قازىناسىندا وزىندىك ورنى مەن تاريحى وزگەشە دۇنيە - قازاقتىڭ سوڭعى حانى كەنەسارى قاسىم ۇلىنىڭ قىلىشى دا حالىقارالىق كورمە قوناقتارىنا ۇسىنىلاتىن بولادى.
«تۇركىستان - تۇركى الەمىنىڭ مادەني استاناسى» جىلى اياسىندا وتكەن فوتوسۋرەتشىلەر كەزدەسۋىندە وڭتۇستىكتىڭ كيەلى جەرلەرىنە قاتىستى تۇسىرىلگەن فوتوتۋىندىلاردان ارنايى كورمە، ءوڭىردىڭ تاريحي، كيەلى جەرلەرىنەن دە ماعلۇماتتار بەرىلەدى.
وڭتۇستىك قازاقستان وبلىسىنىڭ وندىرىستىك- ەكونوميكالىق مۇمكىندىكتەرى مەن تاۋارلارىنان قۇرالعان اۋىلشارۋاشىلىق ونىمدەرى مەن تاۋارلارىنىڭ جارمەڭكە كورمەسى ۇيىمداستىرىلادى. شارادا «وڭتۇستىكتىڭ قاۋىن- قاعى»، «قازىعۇرتتىڭ قىمىزى»، «شاردارانىڭ بالىعى»، «سارىاعاشتىڭ شيپالى سۋى»، «تۇلكىباستىڭ الماسى» اتاۋلارىمەن وڭتۇستىك ونىمدەرىن ۇسىنىلىپ، نارىقتاعى باعادان 15-20 پايىزعا ارزان ساۋدالاناتىن بولادى.
جالپى شارانىڭ قورىتىندىسى 3 -قىركۇيەك كۇنى ساعات 18.00-دە ەكسپو قالاشىعىنىڭ امفيتەاترىندا وڭتۇستىك قازاقستان وبلىسىنان شىققان ونەر جۇلدىزدارى جۇبانىش جەكسەن ۇلى، سەيفۋللين جولبارىس، التىناي جورابايەۆا، زاتتىبەك كوپبوسىن ۇلى، مارجان اراپبايەۆا، نۇرلان ونەربايەۆ سياقتى انشىلەر مەن «شانشار»، «الداراسپان»، «شىمكەنت- شوۋ» ءازىل-سىقاق تەاترلارىنىڭ قاتىسۋمەن وتەتىن گالا-كونسەرتىمەن اياقتالادى.
