استاناداعى مارافون: قىرعىز بەن وزبەك قىزدارى توپ جاردى - فوتو

استانا. قازاقپارات - استانادا وتكەن شانحاي ىنتىماقتاستىق ۇيىمى مەن ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ حالىقارالىق مارافونىندا ايەلدەر اراسىندا ءبىرىنشى بولىپ مارە سىزىعىن قىرعىزستاندىق ۆيكتوريا پوليۋدينا كەستى، دەپ حابارلايدى «قازاقپارات» ح ا ا ءتىلشىسى.

ۆيكتوريا 42 شاقىرىمدىق قاشىقتىقتا مارە سىزىعىن 2 ساعات 37 مينۋت 43 سەكۋندتا كەسىپ ءوتتى. جەڭىمپازعا ديپلوممەن بىرگە 6 مىڭ ا ق ش دوللارى تاپسىرىلدى. ال ودان بار- جوعى 7 سەكۋند قانا قالىپ قويعان وزبەكستاندىق مارينا حمەليەۆسكايا ەكىنشى ورىننان كورىندى. مارەگە ءۇشىنشى بولىپ 2 ساعات 42 مينۋت 21 سەكۋندتا قازاقستاندىق جاناتبەك گۇلجانات جەتتى.

 
 

العاشقى ۇشتىكتەن كەيىنگى توعىز ورىندى مارينا كوروبيتسكايا (قىرعىزستان)، جاننا ماماجانوۆا (قازاقستان، الماتى)، ولگا بوگومولسكايا (قازاقستان، پاۆلودار)، چۋلۋۋنحۋ شينەتسەتسەك (موڭعوليا، ۇلانباتىر)، رۋيكسياڭ حان (بەيجىڭ) پەن قارلىعاش ءسامىجان (قازاقستان، سەمەي) يەلەندى.

 

ەسكە سالا كەتسەك، ەلوردادا ەل تاريحىنداعى تۇڭعىش كاسىبي مارافون جارىسى سوڭىنا جەتتى. حالىقارالىق مارافوننىڭ 2017 مەتر قاشىقتىقتىعى 4 ساناتى بويىنشا وتكىزىلگەن بولاتىن. ال 10 شاقىرىمدىق قاشىقتىقتا ەرلەر اراسىندا قۇدايبەرگەن زەينوللايەۆ ءبىرىنشى بولىپ كەلسە، قىزدار اراسىندا تاتيانا نەروزناك باس جۇلدەگە يە بولدى. مارافوننىڭ 42 شاقىرىمدىق ەڭ ۇزاق قاشىقتىعىندا ەرلەر اراسىندا ءبىرىنشى بولىپ مارە سىزىعىن وزبەكستان ەلىنەن كەلگەن 31 جاستاعى اندرەي پەتروۆ كەسكەن بولاتىن.