قازاقستاننىڭ «نۇر الەم» پاۆيلونىنا كەلگەن ميلليونشى ادام تىركەلدى

استانا. قازاقپارات - قازاقستاننىڭ «نۇر الەم» پاۆيلونىنا كەلگەن ميلليونشى ادام تىركەلدى.

بۇل تۋرالى «ەكسپو-2017» مەديا-ورتالىعىنىڭ مالىمەتىندە ايتىلعان، دەپ حابارلايدى قازاقپارات.

حالىقارالىق كورمە باستالعالى «نۇر الەم» سفەراسى «ەكسپو-2017» اۋماعىندا ادامدار ەڭ كوپ باراتىن نىسانداردىڭ كوشىن باستاپ تۇر.

كۇن سايىن وندا 10 مىڭنان 28 مىڭعا دەيىن ادام قابىلدانادى. كورمە كەزىندە، ياعني جاز ايلارىندا سفەراعا 50 گە تارتا مەملەكەت جانە ۇكىمەت باسشىلارى باردى.

قازاقستاننىڭ ۇلتتىق پاۆيلونى «نۇر الەم» «ەكسپو-2017» كورمەسىنىڭ ساۋلەتتىك سيمۆولى بولىپ تابىلادى.

الەمدەگى ەڭ ۇلكەن سفەرالىق نىساننىڭ ديامەترى 80 مەتر، ال بيىكتىگى 100 مەترگە تەڭ. قۇرىلىمنىڭ قاسبەتىندە كۇن ەنەرگياسىن ەلەكتر قۋاتىنا تۇرلەندىرەتىن فوتوۆولتايكالىق ەلەمەنتتەردىڭ بىرىگۋى ويلاستىرىلعان. سونىمەن قاتار سفەرانىڭ جوعارعى جاعىندا 2 جەل گەنەراتورى قاراستىرىلعان.