قازاقستان وقۋشىلارى قيىن ءۇي تاپسىرماسىن راديونىڭ تىكەلەي ەفيرىندە ورىنداي الادى
96 جىلدىق تاريحى بار «رەسپۋبليكالىق راديونىڭ» قۇرامىنا «Qazaq radiosy» ، «Shalqar» ، «Astana» ، «Klassik» راديولارى بىرىكتىرىلگەنى بەلگىلى. «Qazaq radiosy» تىڭدارماندار ءۇشىن جاڭا ماۋسىمدى «كەزەڭ» ، «الاڭ» ، «الاشناما» ، «الەم ادەبيەتى» ، «قاۋىرسىن قالام» ، «ارا» ، «جىر كەرۋەن» ، «ايتىس» ، «الداسپان» ، «سارباز» ، «اق وتاۋ» ، «جان جىلۋى» ، «ءۇي تاپسىرماسى» ، «ءسۇيىنشى» باعدارلامالارىمەن اشاتىن بولادى. الماس الماتوۆ، كوپەن امىربەك، امانگەلدى كەڭشىلىك ۇلى، امانگەلدى قۇرمەت، قالقامان سارين، نازيرا بەردالى، قىدىربەك رىسبەك ۇلى، اقبايان ساپارباي سىندى بەلگىلى ەفير جۇرگىزۋشىلەرى راديودان حابار تاراتىپ، باعدارلامالاردى جۇرگىزەدى.
«جاڭا تەليەۆيزيالىق ماۋسىمدا تەلەارنالاردان قالىسپاي، ءوزىنىڭ تاريحىندا العاش رەت ءبىزدىڭ راديو ۇجىمى كورپوراتسيانىڭ قۇرامداس بولىگى رەتىندە باستاعالى وتىر. وزدەرىڭىز كورىپ وتىرعانداي، ءبىزدىڭ لوگومىز بەن اتاۋىمىز وزگەرتىلدى. ونىڭ سەبەبى بار. ويتكەنى، ءبىزدىڭ اتاۋىمىز «رەسپۋبليكالىق راديو» ج ش س بولاتىن. ءبىراق، حابارلاسقان جۇرتشىلىق «رەسپۋبليكالىق راديو» دەگەن جاڭا راديو ما دەپ كوپ ساۋال قوياتىن. كەيىن توراعامىزبەن، باسشىلىعىمىزبەن اقىلداسا كەلە 96 جىلدىق تاريحى بار «قازاق راديوسىنىڭ» برەندىن نەگىزگە الىپ، وسى ءتورت راديونىڭ باسىن قوسقان مەكەمەنى «AZAQ RADIOLARY» Q دەپ اتاۋدى ءجون سانادىق. ونىڭ قۇرامىنا «Qazaq radiosy» ، «Shalqar» ، «Astana» ، «Klassik» راديولارى كىرەدى» ، - دەيدى ءمادي ماناتبەك.
28 - تامىزدان باستاپ «QAZAQ RADIOLARY» اتاناتىن مەكەمە باسشىسىنىڭ ايتۋىنشا، 4 راديونى جاڭا ماۋسىمدا نەگىزىنەن الەۋمەتتىك، قوعامدىق جانە ساياسي باعىتتا دامىتۋ جوسپارلانىپ وتىر. ونىڭ سىرى دا جوق ەمەس. «مىسالى، «اق وتاۋ» دەگەن باعدارلامانى اشقان سەبەبىمىز، ەلىمىزدە جىل سايىن وتاۋ قۇراتىن 100 وتباسىنىڭ 36-40 جۇبى اجىراسىپ كەتىپ جاتادى. بۇل دەگەنىڭىز، قايماعى بۇزىلماعان قازاق وتباسىنا كەسىر كىردى دەگەن ءسوز. وتباسىن ساقتاۋ ماقساتىندا باعدارلامانى اشتىق. ودان كەيىن «جان جىلۋى» اتتى باعدارلاما ارقىلى قالتالى ازاماتتارعا قايىرىمدىلىق جاساۋدى ۇندەمەكپىز. مىسالى ءۇشىن راديوباعدارلاما ارقىلى 4 جارىم جاستاعى انەل دەگەن قىزدىڭ ەمىنە 14 ميلليون تەڭگە تاۋىپ بەردىك. قىزىلورداداعى كوپبالالى وتباسىعا 3 بولمەلى پاتەردىڭ بەرىلۋىنە سەبەپكەر بولدىق. سول سەكىلدى مىسالدار كوپ. ۇشىنشىدەن، «ءۇي تاپسىرماسى» دەگەن باعدارلاما قوسىلدى. ويتكەنى، جىل سايىن مەكتەپ وقۋشىلارىنا بەرىلەتىن تاپسىرمالار وزگەرەدى. سومكەسى دە، تاپسىرماسى دا اۋىر. سوندىقتان، بالالارعا وڭاي بولسىن دەيمىز. بالالار تىكەلەي ەفيردە حابارلاسىپ، اپتاسىنا بەس رەت، ساعات 15:00-16:00 ارالىعىندا سۇراق قويىپ، پاندەر بويىنشا سۇراقتارعا جاۋاپ الا الادى» ، - دەيدى ول. ەڭ قىزىعى، جوعارىدا اتالعانداردىڭ ۇشەۋى دە تەليەۆيزيالىق باعدارلاما بولعان. ءبىراق، مەكەمە باسشىلىعى تاجىريبە جاساپ، ولاردى راديوعا ەنگىزگەن ەكەن. سونداي- اق، قوعامدىق ساياسي جاعىنان پرەزيدەنتتىڭ «رۋحاني جاڭعىرۋ» ماقالاسىنا وراي «كەزەڭ» دەگەن باعدارلاما اشىلىپ وتىر. ول دۇيسەنبى، سارسەنبى، بەيسەنبى كۇندەرى جۇرەدى. «الاڭ» اتتى ساياسي توك- شوۋدى قولعا العان ەفير جۇرگىزۋشىسى امانگەلدى قۇرمەت ۇلى ەلىمىزدە بولىپ جاتقان احۋالدارعا تەرەڭ بويلاماق. بۇعان قوسا جاڭا ماۋسىمنان باستاپ «الاشناما» باعدارلاماسى قازاق ۇلتىنىڭ قالىپتاسۋ تاريحىنان سىر شەرتەدى. «بۇكىل راديولارىمىزدىڭ بارلىعىن ينتەرنەت جەلىسىنە، الەۋمەتتىك جەلىلەرگە، WhatsApp قا قوستىق. سول نومىرگە حالىق قۇتتىقتاۋلارىن جانە تاعى باسقا حابارلامالارىن جىبەرە الادى» ، - دەپ ءتۇيدى ءمادي ماناتبەك.
ەسكە سالا كەتسەك، 23 - تامىزدا استانا قالاسىندا «قازاقستان» تەلەراديوكورپوراتسياسىنىڭ 2017-2018 -جىلعى جاڭا تەلەماۋسىمىنىڭ تۇساۋكەسەرى مەن جاڭارتىلعان برەندىنىڭ تانىستىرىلىمى وتكەن بولاتىن. سالتاناتتى شاراعا ق ر اقپارات جانە كوممۋنيكاتسيالار ءمينيسترى داۋرەن ابايەۆ، قوعام قايراتكەرلەرى، رەسپۋبليكالىق، ايماقتىق اقپارات قۇرالدارىنىڭ باسشىلارى كەلىپ، تەلەراديوكورپوراتسياعا قاراستى مەديااكتيۆتەردىڭ 28- تامىزدا باستايتىن تىڭ جۇمىسىمەن تانىستى.
اۆتور: ايان بەكەن ۇلى
