الەمنىڭ ءار تۇكپىرىندە جۇرگەن اقتوبەلىكتەر قىركۇيەكتە باس قوسادى

اقتوبە. قازاقپارات - قىركۇيەكتە «اقتوبە - قۇتتى مەكەن» فورۋمى وتەدى.

شاراعا الەمنىڭ تۇكپىر-تۇكپىرىندە جۇرگەن اقتوبەلىكتەر قاتىسىپ، تۋعان جەردىڭ دامۋىنا ۇلەس قوسۋ، قولدان كەلەر كومەك بەرۋ ماسەلەلەرىن تالقىلايتىن بولادى، دەپ حابارلايدى قازاقپارات ءتىلشىسى.

ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىنىڭ «تۋعان جەر» جوباسى اقتوبەدە كەڭ كولەمدە ىسكە اسىرىلۋدا.

بۇگىندە وڭىردە «اقتوبە - قۇتتى مەكەن» فورۋمىنا دايىندىق ءجۇرىپ جاتىر. قازىرگى كۇنى الەمنىڭ 15 ەلىندە تۇراتىن 200 دەن استام اقتوبەلىك تۋعان جەرگە كەلىپ، فورۋمعا قاتىسۋعا كەلىسىم بەرگەن.

«تۋعان جەرگە دەگەن ىقىلاس پەن پاتريوتيزمدى قالىپتاستىرۋ ماقساتىندا فورۋم ۇيىمداستىرىپ وتىرمىز. اقتوبە جەرىندە تۋىپ-ءوسىپ، جۇمىس ىستەگەن جەرلەستەرىمىزدى ءوڭىردىڭ الەۋمەتتىك-ەكونوميكالىق دامۋىنا ۇلەس قوسۋعا شاقىرامىز. ءتىزىم جاسالدى. بارلىعى 321 ادامنىڭ اتى-ءجونى مەن ولارعا قاتىستى مالىمەت جيناقتالدى. قازىرگى كۇنى الەمنىڭ 15 ەلىندە تۇراتىن 218 ادام فورۋمعا قاتىسۋعا كەلىسىم بەردى. ولاردىڭ قاتارىندا كاسىپكەرلەر مەن مادەنيەت، ونەر قايراتكەرلەرى، سپورتشىلار بار»، - دەدى فورۋمدى ۇيىمداستىرۋ كوميتەتىنىڭ ءتورايىمى ءسانيا قالدىعۇلوۆا.

فورۋم اياسىندا اتاقتى اقتوبەلىكتەر ءتۇرلى سەمينارلار وتكىزىپ، شەبەرلىك ساباقتارىن ۇيىمداستىرادى. قايىرىمدىلىق كونسەرتتەر بولادى. عىلىمي-تاجىريبەلىك كونفەرەنسيالار وتەدى.

فورۋم كەزىندە بيزنەستىڭ الەۋمەتتىك جاۋاپكەرشىلىگى اياسىندا سالىنىپ جاتقان جاستار سارايى، جەكپە-جەك سارايى مەن شىعارماشىلىق اكادەمياسىن اشۋ جوسپارلانعان.

«تۋعان جەر» باعدارلاماسى اياسىندا «تۋعان جەرگە تاعزىم» اكسياسى ءوتىپ جاتىر. العاشقى جارتىجىلدىقتا اقتوبەلىكتەر قۇنى 1 ميلليارد تەڭگە بولاتىن 338 جوباعا قولداۋ كورسەتتى.

الەۋمەتتىك نىسانداردى سالۋ، قايتا قالپىنا كەلتىرۋ، ولاردى زاماناۋي تەحنولوگيامەن جابدىقتاۋ، كوگالداندىرۋ، جول جوندەۋ جۇمىستارى ءجۇردى»، - دەدى س. قالدىعۇلوۆا.

ايتا كەتەيىك، فورۋمعا وراي اقتوبەدە zherlester.akt.kz ينتەرنەت-رەسۋرسى ىسكە قوسىلدى.

اۆتور: التىناي ساعىندىقوۆا