الەم چەمپيوناتى: پاريجدە تاعى ءبىر قازاق بالۋانى فينالعا شىقتى

استانا. قازاقپارات - فرانسيانىڭ پاريج قالاسىندا كۇرەس تۇرلەرىنەن ءوتىپ جاتقان الەم چەمپيوناتىندا تاعى ءبىر قازاق بالۋانى مەيرامبەك ايناعۇلوۆ فينالعا شىقتى.

بۇل تۋرالى قازاقپارات ءتىلشىسى بىرىنشىلىكتە جۇرگەن بەيجىڭ وليمپياداسىنىڭ جۇلدەگەرى نۇرباقىت تەڭىزبايەۆقا سىلتەمە جاساپ حابارلايدى.

«مىنە، بۇگىن الەم بىرىنشىلىگىنىڭ ەكىنشى كۇنى! كەشە 71 كەلى سالماقتاعى باۋىرىمىز فينالعا دەيىن سۇرىنبەي جەتىپ، العاشقى كۇمىس جۇلدەنى جەڭىپ السا، بۇگىن 59 كەلى سالماقتا تاعى ءبىر باۋىرىمىز فينالعا شىقتى. ول شيرەك فينالدا كورەيالىق بالۋاندى ەش قينالماي ۇتتى. بۇل قازاق ەلى ءۇشىن ۇلكەن جەتىستىك. وسىعان دەيىن گرەك-ريم كۇرەسىنەن ەكى قازاق بالاسى ءبىر الەم بىرىنشىلىگىندە فينالعا دەيىن جەتىپ كورمەگەن. بۇل ەلىمىزدە گرەك-ريم كۇرەسىنىڭ قارقىندى دامىپ كەلە جاتقانىنىڭ ايقىن دالەلى»، - دەپ اتاپ ءوتتى ن. تەڭىزبايەۆ.

ەستەرىڭىزگە سالا كەتەيىك، مەيرامبەك ايناعۇلوۆ توپتىق كەزەڭدە قارسىلاسىن بار بولعانى 29 سەكۋندتا 8:0 ەسەبىمەن ۇتىپ شيرەك فينالعا جولداما الدى. سونداي-اق، وتانداسىمىز وسى الەم بىرىنشىلىگىندەگى قارسىلاسىن ەڭ جىلدام ۇتقان بالۋانداردىڭ ءبىرى اتاندى.

اۆتور: كۇنسۇلتان وتارباي